Asturies ¿factoría de software?

El Presidente asturianu Vicente Álvarez Areces, va asistir esta tarde en Samartín del Rei Aurelio a la presentación d'un proyectu qu'encabeza la empresa El Corte Inglés, que va llevar a Blimea ún de los sos centros de desarrollu de software.

L'anuncia por parte de El Corte Inglés, qu'amás de ser una de les principales empreses de distribución españoles, tien tamién una importante estaya de nueves tecnoloxíes, preséntase como un proyectu que va xenerar alredor de cien puestos de trabayu nel so primer añu de funcionamientu y que va especializase nel desarrollu y caltenimientu d'aplicaciones informátiques pa empreses y alministraciones públiques y que va apurrir tamién servicios de tratamientu de documentos. La estaya de consultoría y servicios d'Informática de El Corte Inglés tien agora mesmo centros de de desarrollu de software en Madrid y Barcelona y declaró qu'invertía n'Asturies porque na nuestra comunidá hai xente con titulación y mui bien formao y un entornu llaboral y social favorable".

La estaya d'Informática de El Corte Inglés conviértese asina na segunda gran empresa del sector qu'escueye Asturies, y concretamente'l Valle del Nalón, p'asitiar una de les sos fábriques, tres de la llegada de la empresa Capgemini l'añu pasáu. El treslláu a la cuenca'l Nalón del Centru d'Atención de Llamaes de la empresa Telecable -que taba enantes en Valladolid- y la creación d'otres empreses de menos sonadía pero tamién rellacionaes col sector como la empresa de cartografía dixital Venturo XXI tan moviendo un importante volume de puestos de trabayu na Cuenca, sumando ente toes estes empreses más de 650 puestos de trabayu contando colos que vaya crear El Corte Inglés. Los porqués de la llegada a Asturies d'empreses d'esta triba, y los beneficios y perxuicios que puen traer arreyaes, analízalos nesta tribuna dientro de la sección "opiniones" d'Asturies.com l'espertu en nueves tecnoloxíes Xabiel G. Pañeda.