Asturianu nos conceyos

Esti día, los conceyales de Villaviciosa Mundo Collada (ex-PAS) y los del PSOE presentaron dos propuestes pa que'l conceyu posibilitara y regulara l'usu del asturianu dientro del ámbitu municipal. El conceyal de URAS apoyó les propuestes y, sorprendentemente, el PP nel equipu de gobiernu comprometióse a consensuar ente toos un documentu p'aprobalu en Xunta de Portavoces.
Anque'l día enantes l'alcalde refugare la posibilidá de qu'en Villaviciosa se pudiere aprobar una "regulación" del usu de la llingua asturiana, viendo'l resultáu en Nava, onde una llei municipal d'esti tipu resultó impugnada pola Delegación del Gobiernu central n'Asturies, los conceyales del PSOE y Mundo alegaron que ésto podría facese ablugándose no previsto na Llei d'Usu y Promoción del Asturianu de 1998, onde se recueye la posibilidá de llexislaciones municipales específiques nesti tema.
Enantes d'esto, la formación política Andecha Astur presentara una propuesta d'ordenances que quedaron de tratase nun plenu estraordinariu que nunca llegó a facese. La formación nacionalista diz que ta estudiando la posibilidá de querellase llegalmente por ello y llamenta'l nuevu compromisu algamáu, que llega a calificar per boca d'un portavoz como "otru exemplu de represión llingüística".
Per otru llau, el grupu municipal d'Izquierda Xunida de Siero dixo esta selmana que d'equí a finales de febreru va a entamase midíes pa la promoción del usu de la llingua asturiana nel conceyu. El so portavoz, Nicolás Fernández, manifestó que IX apoya dafechu'l conteníu de los documentos presentaos pola Xunta pola Defensa de la Llingua la selmana pasada, que contemplen la puesta en marcha d'unes ordenances que garanticen los derechos llingüísticos, asina como midíes pa la promoción y usu del idioma dientro de la institución municipal y les sos rellaciones colos ciudadanos, que se concretaríen cola creación d'un "Serviciu de Normalización Llingüística". Fernández dixo qu'igual hai que-yos facer dalgún retoque técnicu alos documentos presentaos, pero que d'otra manera van apoyalos dafechu. Nesti sen hai que s'alcordar que IX ye parte del gobiernu "tripartitu" que gobierna Siero con mayoría.