Asturgold ficha a ún de los fundadores de Greenpeace pa promocionar la mina d’oru de Tapia

La compañía Asturgold nun cesa nos sos intentos pa convencer a los tapiegos y ciudadanos del occidente del país p’abrir una mina d’oru en Salave. La so operación última ye la contratación d’ún de los fundadores de Greenpeace.

Asina, Patrick Moore va formar parte, como independiente, de la xunta directiva de la empresa de capital canadiense con sede en Tapia y vixará a Asturies nes selmanes próximes. Natural de British Columbia, Moore foi una de les persones qu’entamó’l proyeutu de Greenpeace, llegando inclusive a presidir la ONG en Canadá y a ser direutor internacional del coleutivu, pa depués apostar por un ecoloxismu ‘razonable’, que se basa más no científico que no ideolóxico. Anguaño, el canadiense, qu’abandonó Greenpeace nel 1986 “non por decisión propia”, ye un defensor de la enerxía nuclear y muestráse favoratible a les teoríes q’afiten que’l cambiu climáticu nun se produz namái pol efeutu de la mano del home.

Asturgold apuesta por contratar a Moore al consideralo “un activu únicu de cara al desendolque del proyeutu de Salave, asina como d’iniciatives futurues”, cola intención de que la so presencia sirva de consensu ente les alministraciones y coleutivos ecoloxistes. Sicasí, los doce grupos medioambientales que vienen refugando la mina d’oru de Tapia dende que se conoció’l proyeutu, caltienen la so postura, según anunciaron güei nun comunicáu. “Les organizaciones ecoloxistes asturianes queremos repitir la nuesa oposición a la iniciativa minera de Salave que se pretende nos conceyos de Tapia, Castropol y El Franco, dao’l so impautu ambiental inasumible, el so riesgu ciertu pa la salú de la población y les consecuencies incompatibles col desarrollu sostenible de la costa occidental. Y ello con absoluta independencia de los gastos de prensa y propaganda que faiga’l promotor Asturgold, anunciando la contratación de empreses tiñíes de dalgún méritu ecoloxista remotu, manexando colmenes o tolo que se-y venda”, afirmen.

La Coordinadora Ecoloxista d’Asturies, Asociación Asturiana de Amigos de la Naturaleza (ANA), l’Asociación Salvemos los territorios del Bajo Navia-SALTERNAVIA, el Grupu d’Ornitoloxía Mavea, l’Asociación Ultravioleta, l’Instituto para la Calidad y Educación Ambiental-Inscean, l’Asociación para la Conservación y Estudio del Lobo (ASCEL), la Plataforma por la Defensa de la Cordillera Cantábrica, l’Asociación para la Defensa Jurídica del Medio Ambiente-ULEX, l’Asociación Verdes Asturianos, SOS Cuideiru y el Colectivo Ecologista de Avilés mantienen que “l’actividá minera tendría un impautu negativu importante sobre’l modelu socioeconómicu de la zona, basáu na agricultura, ganadería y, de manera mui significativa, nel turismu de paisaje” y recuerden los riesgos de contaminación que tendría la estraición del oru. D’igual forma, critiquen l’usu que ta faciendo Asturgold de les necesidaes llaborales de la xente de la zona y recuerden la asocedío con otres esplotaciones auríferes anteriores, como Balmonte y Salas.

Na semeya, llagos de Silva (Salave).