Día del Llibru Asturianu

asturAire, l’aplicación pa la consulta de los datos de contaminación

|
Elena Marañón, Benigno Fernández Fano y Paz Orviz

La Feria Internacional de Muestres d’Asturies (FIDMA) acoyó la presentación de l’aplicación pa dispositivos móviles asturAire. Ésta permite conocer los datos rexistraos d'hasta un total de seis contaminantes: partícules en suspensión, dióxidu de nitróxenu, ozonu, dióxidu d'azufre, bencén y monóxidu de carbonu.

Compatible pa sistemes operativos Android y iOS, ye d'accesu llibre y de baldre, con un mou de consulta intuitivu, y ye una iniciativa del Gobiernu dientro de les iniciatives afitaes nos sos planes de calidá del aire que desarrolló la empresa B1 Apps. Pa caún de los seis contaminantes que controla calcula un índiz que tien en cuenta los valores medios de les postreres 24 hores, a esceición del bencén, pal que s'utilicen les midíes de los siete díes últimos.

Pa establecer esti índiz estrema'l valor mediu del contaminante pol de referencia establecíu na llexislación y multiplícase por cien. Un valor baxu significa que la concentración del contaminante ye igualmente baxa y, poro, la calidá del aire ye bona.

Otra manera, el valor máximu de 100 correspuéndese col valor llende de referencia que la llei establez pa cada contaminante. La ferramienta tamién permite que l’Alministración notifique les previsiones d’estabilidá atmosférica que dificulten la dispersión de contaminantes y, nel so casu, l'activación del protocolu en cualesquiera de los sos trés niveles: 0 (preventivu), 1 (avisu) y 2 (alerta).

Amás, los usuarios van tener la opción de configurar avisos personalizaos pa cada contaminante y estación.

Na semeya, Elena Marañón, direutora xeneral de Prevención y Control Ambiental; Benigno Fernández Fano, viceconseyeru de Mediu Ambiente; y Paz Orviz, direutora xeneral de Calidá Ambiental, nun momentu de la presentación de l'aplicación.

Contador Estadistiques