Asesinatu en Líbanu

La noticia más importante de l'actualidá internacional ye l'asesinatu ayeri d'Elei Hobeika, testigu clave nel xuiciu contra Ariel Xarón poles matances de refuxaos palestinos en Xabra y Xatila nel 82, cuando Israel invadió el Líbanu. D'aquella Xarón, ministru de defensa d'Israel, tuvo qu'acabar dimitiendo cuando una comisión israelí descubrió qu'elli yera "culpable indirectu" de la masacre. 19 años dempués, un grupu de supervivientes de Xabra y Xatila punxo una denuncia contra Xarón nun tribunal belga. Los denunciantes tienen un sitiu web nel qu'esponen los sos argumentos.Anque entovía nun se sabe si Bruseles tien competencia pa facer esti xuiciu, Hobeika, líder del grupu de milicianos cristianos que fexo la masacre, yera'l testigu que más podía perxudicar al Xarón. Hobeika, amás de carniceru nos campos palestinos, yera un chaqueteru que nun tuvo reparu nengún en cambiar de bandu delles veces, y anque nel 82 andaba más arrimáu a Xarón, yera anguaño enemigu declaráu d'Israel. La so intención de declarar contra Xarón en Bruseles punxo en guardia al vieyu ferre israelín, al que s'apunta agora como responsable del asesinatu. Robert Fisk tien esti interesantu artículu nel Independent sobre l'asesinatu.Mientres, la situación n'oriente mediu sigue cociendo guerra, y la última hora ye qu'un suicida acaba d'españar una bomba nuna estación d'autobuses de Tel Aviv. Más información nel Jerusalem Post