Arxentina decide garrar el camín inesploráu que guía Javier Milei

L'ultraderechista supera con amplitú a Massa al rexistrar un 55,69 por cientu del total de votos.

L'apoyu de la derecha a Javier Milei dio al líder de La Libertad Avanza la presidencia d'Arxentina. L'ex dirixente Mauricio Macri, de Juntos por el Cambio, tercera fuercia nes eleiciones del 22 d'ochobre que presentó a Patricia Bullrich como candidata, posicionóse claramente a favor d'un candidatu que na primer vuelta algamara un 29,99 por cientu, lo que-y valió pa superar el 36,78 por cientu de Sergio Massa nesa xornada.

El peronista, ministru d'Economía del Gobiernu d'Alberto Ángel Fernández, aumentó'l so apoyu hasta un 44,30 por cientu, lloñe del 55,69 por cientu de Milei nuna segunda vuelta con una participación del 76,31 por cientu. La diferencia entrambos, 3 millones de votos.

D'esta manera Arxentina déxase cortexar por un discursu asemeyáu en munchos aspeutos al que trunfara n'Estaos Xuníos con Donald Trump y en Brasil con Jair Bolsonaro, políticos que duraron una llexislatura al frente de los sos países. L'escéntricu líder d'un partíu con dos años de vida va guiar al pueblu arxentín per un camín inesploráu énte la incertidume de si va cumplir coles promeses d'acabar col Banco Central y dolarizar el país, privatizar empreses públiques o pesllar ministerios y planes sociales.

Na imaxe, Milei recibe l'apoyu de ciudadanos nel momentu d'acudir a votar.