Artistes y diseñadores contra Le Pen

Cola segunda vuelta de les elecciones pa esti fin de selmana, Francia vive ente'l noxu de tener que votar a Chirac pa que nun salga presidente l'ultraderechista Le Pen y la preocupación de saber que la ultraderecha yá ye una realidá afitada n'Europa capaz de caltriar hasta na República por antonomasia. Naide piensa nun trunfu del Frente Nacional, pero una abstención masiva podría da-y un porcentaxe de votu significativu a Le Pen, que, convertíu nun personaxe más de la política gala, igual estiraba'l tirón hasta les prósimes lexislatives. De momentu, l'ultra austriacu Georg Haider, Le Pen y otros candidatos de la estrema derecha yá tan cavilando pa preparar una candidatura conxunta a les europees.

Ello ye que en Francia vívese una conxura nacional pa dexar a Le Pen fuera de xuegu, y diseñadores y publicistes tan participando nella. El diariu Liberation espubliza un estoyu de banners, anuncios y animaciones en flash contra Jean Marie Le Pen unviaos lo mesmo por profesionales que por aficionaos. Nos webs de diseñu de Correct/Incorrect, Overage4design o Agent Graphique pueden vese estes campañes desarrollaes, mientres el web Contre-Le Pen, fechu ad hoc pa estes elecciones recueye un bon estoyu de cartelería anti lepeniana. Sicasí, como Chirac tampoco nun ye'l meyor candidatu de los posibles, dase una imaxe d'elli un poco
especial