Artistes asturianos participen nel Celtic Connections de Glasgow

Estos díes tán faciendo'l viaxe hasta Escocia dellos artistes
asturianos pa participar nel que problabemente ye'l festival de música
folk más importante del mundu, el
Celtic Connections de Glasgow.
Ellí van tar músicos asturianos como'l cantante Chus Pedro, el
gaiteru José Manuel Tejedor y tamién el bouzoukista de Felpeyu Ígor
Medio.



Toos estos músicos van participar na reedición d'un conciertu que
yá se fizo l'añu pasáu y qu'axunta a músicos mozos
escoceses colo meyor del folk européu. Esti conciertu, que va ser el
día 22, lleva'l nome de
Donald
Shaw's Harvest, que fai referencia al so promotor, l'escoces y músicu
de "Capercaille"
Donald Shaw.
Nesta sesión especial van axuntase a los músicos asturianos xente del altor de
Jean Michel Veillon de Kornog, el guitarrista bretón Gilles le Bigot o Michael McGoldrick, veteranu de distintes formaciones como Lunasa o Capercaille, ente otros. Asina,
mientres que Chus Pedro y José Manuel Tejedor van actuar como solistes,
Ígor Medio va participar nuna superbanda que va ser la base pa les actuaciones de tolos solites y na que va
compartir escenariu col propiu Donald Shaw, la batería de James Mackintosh (de Shooglenifty) y el baxu d'Ewen Vernal, miembru de
"Capercaille" y que n'otru tiempu fuere'l baxista del grupu
escocés de pop "Deacon
Blue" que trunfare a últimos de los ochenta.



Con too y con ello, los protagonistes d'esti conciertu son los alredor de 80
mozos y moces que toquen xunta toos estos grandes músicos a lo llargo de
tol conciertu. Trátase de los meyores nes sos promociones de les academies
de música folk d'Escocia, y pa ellos ye un premiu pergrande poder tocar
nel Celtic Connections xunta lo meyor del folk internacional.



Per otru llau, Chus Pedro, amás de particpar nel conciertu de Donald
Shaw, tamién va actuar cola so banda pa facer los cantares del so discu
De Ñublu y Orpín. El cantante asturianu va compartir l'escenariu con una de les grandes voces del folk, Karen Matheson, cantante de
"Capercaille" l'otru grupu que va actuar xunta los asturianos.