Arranca la vacunación contra'l gripe y la COVID-19

Los internos en residencia son los primeros en recibila, mentes que pal restu de la población ta programao a partir de la selmana qu'entra, tamién de baldre.

Esta mañana arrancó la campaña de vacunación de la temporada 2023-2024 frente al gripe y la COVID-19. Los centros de salú dirán llamando a les persones en función del so nivel de riesgu a sufrir complicaciones de salú a causa d'estes dos enfermedaes.

La puesta conxunta faise de manera descentralizada y de baldre en tola rede de centros d'Atención Primaria. Les persones interesaes en recibir la vacunación han pidir cita nel so centru de referencia.

Virus sincitial

Tamién entamó güei la inmunización frente al virus sincitial, causante de la bronquiolitis. Ésta recomiéndase a tolos críos que nacieron dende'l 1 d'abril y a otres persones de riesgu.

La vacunación faise tamién en centros de salú, sacante los naciatos. La indicación ye que sían inmunizaos nel propiu centru hospitalariu enantes de l'alta.