Arranca’l FICXixón, que celebra’l so cincuenta aniversariu

El Teatru Xovellanos va acoyer esti vienres la gala d’inauguración del Festival Internacional de Cine de Xixón (FICXixón), que celebra’l so cincuenta aniversariu. Hasta’l 24 de payares, van proyeutase más de 160 películes.

Esta edición del festival, amás de por cumplise 50 años dende la so creación baxo’l nome de Certamen Internacional de Cine y TV Infantil, va ser centru d’atención de los aficionaos al cine asturianu por ser el primeru nel que Nacho Carballo dirixe l’eventu tres la destitución, por decisión de Foro Asturias Ciudadano, de José Luis Cienfuegos, persona qu’impulsó’l certame dende que garró’l cargu nel 1995. Nel so momentu, esti cambiu llevó a más de 400 cineastes a roblar un documentu nel qu’amenazaben con facer un boicó al FICXixón nel casu de que’l Conceyu de Xixón nun diera marcha atrás.

Les persones que s’averen a les sales de Xixón van poder ver 160 películes de 41 estaos, amás d’una esposición con motivu del 50 aniversariu nel Centru de Cultura Antiguu Institutu. La gala inaugural, a cargo de Leticia Dolera, va principiar a les 20.30 hores nel Xovellanos y va contar col estrenu de 'Beyond the hills', del cineasta rumanu Cristian Mungiu, que va asistir al eventu. Según aseguró Carballo na presentación del FICXixón, el númberu de producciones asturianes va ser mayor nesta edición. Nesi sen, mantiénse ‘Esbilla asturiana’, onde va proyeutase’l documental en gallego-asturiano ‘Eu soi quen fun’, de Melania Fraga, y el ‘Día d’Asturies’.

No que respeuta al tema musical, les actuaciones previstes son les siguientes: Micah P. y Timber Timbre (güei, 7 euros); Maceo Plex (mañana, 12); Blues & Decker y Richard Ray Farrell (domingu); Manos de Topo y The Masonics (llunes); The Ripe y Lorena Álvarez (martes); Novedades Carminha y No band for Lluvia (miércoles); Estereotypo y Drumlazers (xueves); Teté & Los Ciclones y Trashtornados (vienres); y Nasty Mondays (sábadu, 8 euros). Tolos conciertos van tener llugar na Sala Acapulco del Casinu d’Asturies a medianueche.

Protesta contra la financiación israelina

Delles organizaciones asturianes, ente elles el Comité de Solidaridá cola Causa Árabe d’Asturies, amosaron el so descontentu pola financiación que l’Estáu d’Israel al FICXixón pa la proyeición de delles películas y curtios israelinos na seición oficial y nel ciclu ‘Enfants terribles’. Según denuncien, el Ministeriu de Cultura, al traviés de la so embaxada nel Estáu, paga los gastos de desplazamientu y estancia en Xixón de los sos direutores pa promocionar la producción cinematográfica. Poro, y sofitando a la Plataforma Europea pal Boicó Académicu y Cultural a Israel (EPACBI), convoquen una concentración de protesta’l domingu a les 18 hores, frente al Teatru Xovellanos, coincidiendo cola emisión del filme ‘Epilogue’, d’Amir Manor.