Arístegui critica les subvenciones al asturianu

El diputáu del PP y portavoz adxuntu del grupu popular na Xunta Xeneral del Principáu cuestionó la voluntá real del gobiernu asturianu en política de normalización al rau de la baxa aceptación de les subvenciones al asturianu nos conceyos.

Falta d'enfotu normalizador real y voluntá de facer namás un xestu de cara a la galería son les principales acusaciones que fexo'l diputáu popular al Gobiernu asturianu ayeri. Ello vieno al rau de la baxa aceptación que, al so paecer, tienen les subvenciones a la promoción del asturianu nos conceyos y la baxa dotación que se-yos da a les mesmes dende'l Gobiernu asturianu.

El diputáu popular avilesín presentó un estudiu del PP sobre les subvenciones otorgaes polos executivos arecistes dende l'añu 2000, declarando que namás 37 de los 78 conceyos asturianos solicitaron estes ayudes nel exerciciu pasáu. Arístegui dixo que namás 17 conceyos les pidieron con un mínimu de continuidá y sorrayó qu'incluso los mesmos conceyos en que gobierna Izquierda Xunida, principal dfensora del asturianu, nun s'aprovechen estes subvenciones nin s'entamen polítiques actives de defensa del asturianu, lo que demostraría pal diputáu del PP que l'apueste normalizador del executivu asturianu nun ye seriu y tien namás un enfotu estéticu que de compromisu real.