Arias-Cachero diz qu’una orde xudicial reintegrarálu nel Grupu Popular

El conceyal non adscritu del Conceyu d'Uviéu, José Suárez Arias-Cachero “Felechosa”, afirmó esti llunes que tien el convencimientu de que va ser reintegráu por orde xudicial nel Grupu Popular.

Arias-Cachero foi cesáu a finales de setiembre pol alcalde "por supuestes irregularidaes en delles contrataciones", pero señaló que nunca debió ser escluyíu. Realizó estes manifestaciones a los periodistes nel salón de Plenos del Conceyu d'Uviéu al empiezu del Plenu ordinariu.   
  
L'ex edil del PP señaló qu'hai "novedaes significatives" na actuación xudicial venceyaes col so cese. Per un llau, afirmó qu'un xulgáu d'Uviéu almitió a tramite la demanda civil por bilordios contra'l teniente d'alcalde, Agustín Iglesias Caunedo, y per otru llau, destacó qu'hai un procedimientu contenciosu-alministrativu en trámite porque los sos derechos fundamentales fueron mancaos al ser escluyíu "illegalmente" del grupu popular.
  
A lo último, Arias-Cachero refirióse al Comité Nacional de Derechos y Garantíes que-y unvió l'acuse de recibu de les dos iniciatives relatives a la so solicitú d'amparu y al pidimientu de que s’abra un espediente contra Iglesias Caunedo poles sos declaraciones contra un compañeru de partíu.
  
Blog propiu
Per otra parte, anunció la puesta en marcha d'un blogue, 'elcarbayón.com' que lu va sirvir como "preséu de comunicación" y pa lluchar contra la so "inxusta" destitución.