Argüeru acoyó’l Día de la Oveya Xalda

L'Ecomuséu Ca L'Asturcón, na parroquia d'Argüeru en conceyu de Villaviciosa acoyó esti sábadu la VII xornada de l'Asociación de criadores d'Oveya Xalda Asturiana (ACOXA) un actu al qu'asistió'l director xeneral de Ganadería, Ibo Álvarez.

Anque entovía en peligru d'estinción, como remembró'l presidente d'ACOXA José Antonio Álvarez, el llabor de l'Asociación de Criadores, fundada nel añu 1994 y tamién el sofitu institucional tan abriéndo-y a la oveya xalda perspectives de futuru. Va facer agora un añu, la Conseyería de Mediu Rural y Pesca y l'Asociación de Criadores d'Oveya Xalda ACOXA firmaron un conveniu de collaboración pa trés años dotáu con 103.000 euros pa la conservación d'esta especie autóctona del país.

Les cifres en que se mueve la oveya xalda son modestes. Al añu nacen una media de 400 corderos, pero ACOXA quier llegar a tener una población estable alredor de les 1.000 femes y a los dalgo más de 100 machos, que, con ser muncho, quedaría mui lloñe de les 600.000 femes qu'esistíen nel sieglu XVIII al dicir de José Antonio Alvarez. Tamién ye preciso meyorar la cifra de criadores dedicaos a la especie, qu'agora mesmo ye de 72.

Pa xubir estes cifres, dende ACOXA afalen a comer carne d'Oveya Xalda, porque pa qu'haya más xente criando y más animales, ye preciso qu'esta carne seya de consumu, anque ello paeza paradóxico pol fechu de qu'esta especie tuviere nun tris de quedar desaniciada, cuando a mediaos del sieglu XX la oveya xalda quedó arrequexada pola entrada masiva d'otres variedaes capaces de producir más carne en menos tiempu.

Más información: ACOXA y Ca l'Asturcón