Argüelles apuesta por una 'axenda pela izquierda' pa garantizar el futuru del país y llama a llegar a alcuerdos

El coordinador xeneral d’Izquierda Xunida (IX), Ramón Argüelles, reinvindicó na fiesta pol Día d’Asturies entamada nel Muséu del Pueblu d’Asturies l’apueste por una ‘axenda pela izquierda’ pa garantizar el futuru del país. Refugó que l'añu que queda de llexislatura se convierta nuna campaña eleutoral permanente.

Tamién llamó a plantegar alternatives a mediu y llargu plazu con estratexes pa llograr un desenvolvimientu económicu y social, y refirióse a la celebración d'IX como la “contrafiesta” que s’enfrenta a los programes centraos na esaltación monárquica. “Nesti día, que coincide tamién cola celebración en Cuadonga de los 1.300 años del Reinu d’Asturies, el centenariu de la canonización de la Santina o del Parque Nacional de Covadonga, quiero enfatizar que frente a los actos elitistes y pensaos p’agasayar a los poderosos, que ye lo que se desarrolló en Cuadonga, n’IX tamos tratando de celebrar la fiesta de tolos asturianos y asturianes, persones anónimes pero colos qu’ensin el so esfuerciu, compromisu y trabayu nun esistiríemos como pueblu”, afirmó.

La celebración foi amás d'una xornada de confraternización y ociu, un alcuentru p'aldericar y plantegar propuestes polítiques pela izquierda. "Una xornada de reflexón na que vamos poner enriba de la mesa los problemes de lo que creemos que tien que ser una axenda pela izquierda, dende la nuesa fuerza, colos nuesos recursos llendaos, pero que tán ehí: hai cinco diputaos, hai conceyos, hai conceyales, y con eso hai qu’intentar siguir siendo una izquierda propositiva y llegar a alcuerdos; non poner llínees colloraes y sí sentase y axustar y avanzar por qu’esta Asturies sía meyor", siguió.

Un futuru que nun pasa pela descabornización

La eurodiputada Ángela Vallina, pela so parte, sollertó de la necesidá de llantar cara a la situación que vive Asturies. "Lo mesmo que la monarquía ta reivindicando la so historia güei en Cuadonga, nós vamos reivindicar la de nueso y tenemos munches coses que reivindicar n'Asturies, sobre manera un futuru" que, añadió, nun pasa pela descarbonización exprés, más porque "la Xunión Europea dio más plazos".

El coordinador d'IX en Xixón, Faustino Sabio, apuntó que la celebración del Día d'Asturies pol partíu ye más qu'una fiesta, por cuanto que ye tamién un puntu d'inflexón que sirve p'arrancar el cursu políticu. "La organización de Xixón ta encantada d'acoyer esti eventu anguaño y en concencia pensamos que va ser un añu granible”, apuntó.

Entes les munches actividaes que se desendolcaron mientres tol día destacó una presentación de la Wikipedia n’asturianu a cargu de Víctor Suárez y un conciertu de Spanta la Xente que sirvió pa poner el ramu a la folixa.

Na semeya, asistentes a la folixa d'IX nel Muséu del Pueblu d'Asturies pol Día d'Asturies.