Areces tien mieu que l’estatutu catalán dañe a Asturies

El presidente asturianu dixo desconocer el testu del estatutu catalán y declaró que va pidir copia del mesmu p'analizalu.

El presidente asturianu fizo estes declaraciones en Llanes, onde asistió a la inauguración d'unes istalaciones escolares. Vicente Álvarez Areces dixo tamién que tien enfotu en que'l Congresu de los Diputaos va abordar tolos elementos de posibl inconstitucionalidá qe pudiere tener el testu, en cuantes que lo que más-y preocupa "dende la perspectiva d'Asturies" ye que l'estatutu puea alteriar la solidaridá del estáu per aciu de la nueva financiación autonómica que propón, un aspectu qu'Areces cuida que pue que se trate nun marcu distintu al del estatutu, en referencia a posibles alcuerdos nel marcu de la Conferencia de Presidentes.

Areces declaró que cree que puen llegase a alcuerdos pa que se caltenga'l sentimientu d'dentidá catalán al traviés de fórmules qu'espresen "la idea de lo que ye Cataluña nel conxuntu d'España" enfotándose en que'l Congresu de los Diputaos, que "que ye onde reside la soberanía nacional" puea a lo llargo d'estos meses enxertar "elementos correctores d'aquellos elementos que más nos esmolecen del Estatutu catalán." El presidente asturianu dio anuncia de que'l so gobiernu apuesta pol fortalecimientu del Estáu de les Autonomíes, perfeccionándolu y tentando de que cada cual dende la so forma d'interpretar la realidá en que vive "nesa España plural se sienta reconocíu pero dientro d'una España unida, diversa y plural, pero unida nun proyectu común.