Areces promete’l documentu base del estatutu pa últimos d’añu

Nun actu de presentación d'un llibru, el Presidente asturianu adelantó ayeri que cuenta con tener pa últimos d'añu'l documentu base del estatutu. Areces fizo un llamáu a que la reforma que se paute sía de consensu ente los grupos parllamentarios.

Nel actu de presentación d'un llibru sobre la historia de la Organización Nacional de Ciegos, el presidente asturianu declaró que los informes que se-yos encargaron a los comités de sabios sobre la reforma del estatutu yá tan cásique terminaos y "falten mui pocos por entregar". Areces esplicó que, en teniéndolos toos, va facese un procesu de "estudiu internu de los mesmos" del que va salir el documentu d'aniciu pal estudiu de la ponencia parlamentaria.

Areces declaró que "Asturies necesita un procesu de consensu" y esplicó qu'entendía que n'Asturies hai que facer un esfuerzu p'allegar posiciones (…) nel debate parlamentariu y nes posiciones que s'adopten na discusión de la ponencia parlamentaria veráse yá la concreción última, porque ye'l parlamentu'l que tien la última pallabra sobre l'alcance de la reforma estatutaria" Areces quixo afitar que "De momentu, el métodu que siguimos va llevanos probablemente hasta qu'a últimos d'añu podamos ellaborar esi documentu global pa treslladalu a la ponencia parlamentaria".