Areces prepárase pa gobernar con prórroga presupuestaria

El presidente d'Asturies, Vicente Álvarez Areces, pidió-y ayeri n'Uviéu al Partíu Popular (PP) y Izquierda Xunida (IX) que "cambiaren" la so posición de refuga a los presupuestos pal 2008. Areces declaró que la posición adoptada por IX y PP ya se tomare con anterioridá a la presentación del documentu.

En declaraciones a los medios, Areces afirmó "nun entender" qu'estes dos fuercies polítiques presentaren enmiendes a la totalidá de les cuentes.

El presidente asturianu manifestó que les postures d'IX y PP "son contrapuestes" y nun se correspuenden coles polítiques que piden los asturianos. El presidente asturianu tamién declaró que "lo sensato" ye qu'estes formaciones presentaren propuestes y non enmiendes a la totalidá y que'l documentu de presupuestos pal 208 meyora'l presentáu nel 2007 ya qu'aumenta les inversiones n'Asturies.

A pesar de la negativa de los grupos de la oposición a dar el preste a les cuentes de Gobiernu autonómicu, el presidente del Principáu declaró que'l so executivu "va siguir trabayando" polos asturianos. "Voi siguir gobernando porque tengo'l mandatu otorgáu polos asturianos", afirmó Areces.

D'otra parte, el presidente del Principáu venceyó a intereses electorales la refuga nel Senáu a los presupuestos xenerales del Estáu pal 2008. "Esta refuga va a la escontra de los intereses de los ciudadanos y sólo respuende a un intentu de dir escontra'l Gobiernu nun periodu preelectoral", afirmó Areces. El máximu responsable del Gobiernu asturianu añadió que la situación vivida nel Senáu foi "llamentable", pero que "nun va impedir" que los presupuestos s'aprueben.

El presidente asturianu alegó nun entender cómo una formación como Esquerra Republicana de Catalunya, que "pide" más inversiones pa la so comunidá, dempués nun apoya los presupuestos. Areces tamién pidió a los ciudadanos españoles que "tomen bona nota" de les fuercies polítiques que refuguen los presupuestos.

Areces realizó estes declaraciones nel marcu de presentación de la II Conferencia Mundial de Directivos de l'Axencia EFE n'Uviéu. El presidente allabó la función social del citáu mediu informativu pol so llabor en defensa de la llibertá d'espresión.