Areces ofrez una mesa de negociación presupuestaria con sitiu acutáu pa IX

El conseyeru d'Economía y Asuntos Europeos, Jaime Rabanal, caltuvo güei, tres el conceyu con IX-BA-LV relativu a los presupuestos rexonales, que'l Gobiernu punxo "enriba la mesa" más del 80 por cientu de los principios polos que va facese'l documentu final. Según Rabanal, demostróse asina que'l Gobiernu tien "voluntá sincera" de llegar a un alcuerdu.

El conceyu pa tratar el presupuestu, convocáu pol Gobiernu, entamó a les 10.00 hores na sede de Presidencia y al mesmu asistieron el presidente del Principáu, Vicente Álvarez Areces y el conseyeru d'Economía y Asuntos Europeos, Jaime Rabanal, por parte del Gobiernu. En cuantes a la coalición, tuvieron presentes Iglesias, Noemí Martín (IX), Rafael Palacios (BA) y José Antonio Nebot (LV).
A la escontra de la opinión de los responsables d'IX-BA-LV, que se quexaron tres del alcuentru de la falta de concreción y l'ausencia de documentación per parte del Gobiernu, Rabanal dixo que na cita Areces proporcionara "muncha información", anque reconoció que nun fuera numbérica. "El presupuestu nun ye una cuestión meramente tecnocrática, sinón d'orientación y política", señaló'l conseyeru.
De fechu, Rabanal comentó que'l puntu de partida na conversación foi'l documentu políticu que finalmente nun foi aprobáu ente la FSA-PSOE y IX-BA-LV nes negociaciones pa la formación del Gobiernu asturianu tres les últimes elecciones.

Rabanal punxo l'acentu na "necesidá" pa la rexón de contar con unos presupuestos que contribuyan al bienestar de los asturianos. Asina, señaló la "voluntá d'alcuerdu" por parte del Gobiernu y consideró a IX-BA-LV como "preferente" a la hora de llegar a un alcuerdu, a pesar de que ta también previstu un alcuentru col PP. "Asturies requier un esfuerciu de les fuercies polítiques p'aprobar el presupuestu", comentó. En cuantes al plazu del 2 de payares pa llegar a un alcuerdu, dixo que ye'l que marca la tramitación parlamentaria. También confirmó que se-y va unviar documentación detallada'l vienres a IX-BA-LV con delles partíes económiques del presupuestu.

En rellación al conteníu del conceyu, Rabanal esplicó qu'Areces señaló-y a IX-BA-LV el so compromisu pa caltener y potenciar el Salariu Social, asina como la rede 0-3 años. Tamién se refirió a un gran pactu pola vivienda n'Asturies qu'afronte los prolemes derivaos de les variaciones de los tipos d'interés y col que se pueda contemplar la creación d'un fondu de recursos públicos y manifestó la so voluntá de potenciar les polítiques d'emplegu xuvenil, un "compromisu claru" colos conceyos, el desarrollu plenu de la tresferencia de Xusticia. Amás, dixo qu'Areces plantegó a IX-BA-LV la posibilidá de la creación d'una comisión de trabayu, asina como una comisión de siguimientu de la execución presupuestaria, na que diba tar presente la coalición.