Areces inaugura la nueva sede de l'Academia de la Llingua n'Uviéu

|

El presidente d'Asturies, Vicente Álvarez Areces, inauguró esta mañana la nueva sede de l'Academia de la Llingua Asturiana nel Monesteriu de San Pelayo, nes antigües dependencies del Archivu Históricu.

 
Nel actu tamién asistieron la presidenta de l'Academia de la Llingua Asturiana, Ana Cano; la madre abadesa del Monesteriu de les Pelayes, María Teresa Álvarez; la conseyera de Cultura y Turismu, Mercedes Álvarez González; y la directora xeneral de Política Llingüística, Consuelo Vega Díaz, ente otres autoridaes.
  
Areces asumiera'l compromisu d'ubicar a l'Academia asturiana nuna sede digna y adecuada a les necesidaes actuales de la institución. Señaló que la solución escoyida adáptase perfectamente a los intereses de l'Academia de la Llingua y consíguese un allugamientu céntricu, con espaciu pa les distintes oficines, p'almacenes y pal archivu. Anque l'edificiu taba en bones condiciones, nes últimes selmanes procederáse a les obres de reacondicionamientu necesaries pa  afaer el local al nuevu usu.
  
"Consideramos imprescindible ofrecer a l'Academia de la Llingua una sede apropiada pa les sos necesidaes. El treslláu del Archivu Históricu d'Asturies dexómos un espaciu apropiáu a usos culturales, que s'adapta a los deseos de la mesma institución y nel que realizamos un importante llabor de renovación y acondicionamientu, pa crear les condiciones óptimes coles qu'emprestar el meyor serviciu al impulsu de les actividaes de l'Academia de la Llingua Asturiana", esplicó'l Presidente del Principáu mientres la so intervención.
   
Vicente Álvarez Areces tamién quiso recodar que "d'esta manera cumplimos un vieyu deséu, que l'Academia de la Llingua Asturiana cuente con una sede amplia nel centru históricu d'Uviéu".
  
Perres pal “bable-asturianu”
El Presidente del Principáu tamién esplicó que l'apoyu y aumentu presupuestariu a la promoción del bable asturianu ye una muestra del so compromisu constante cola política llingüística. Asina, señaló que se pasó de los 971.716 euros que se destinaron nel presupuestu de 1999, a los más de trés millones de presupuestu específicu de l'actualidá, a los qu'hai qu'añadir otros diez millones d'euros añales nel marcu de política tresversal.

"El presupuestu específicu d'esti añu 2010, a pesar de los condicionantes presupuestarios, supón una subida superior al  23% con respecto al entamu de la llexislatura", indicó.
   
Pela so parte, la presidenta de l'Academia de la Llingua, Ana Cano, agradeció al Principáu les xestiones realizaes y señaló que la nueva sede ye un "llugar dignu" nel que poder desarrollar meyor el trabayu que se realiza. Amás, comentó que va valir pa qu'haya más becarios y puea acoyese a más investigadores.
 

Contador Estadistiques