Areces firmó nel Brasil el conveniu pal Muséu Niemeyer

El presidente asturianu Vicente Álvarez Areces, la Conseyera de Cultura Ana Rosa Migoya y l'Alcalde d'Avilés Santiago Rodríguez desplazáronse ayeri a Brasil pa firmar col arquitectu Óscar Niemeyer el conveniu pa la creación d'un centru museísticu y cultural na Ría d'Avilés y nel qu'atechar la historia de los 25 años de los Premios Príncipe d'Asturies.

L'arquitectu brasileñu de 98 años, autor de dellos de los edificios institucionales más importantes del Brasil, de dellos edificios europeos d'importancia como la sede parisina del Partíu Comunista Francés y del urbanismu de la ciudá de Brasilia, onde'l Gobiernu del Brasil fizo treslladó la so capital a primeros de la década de los 60 del pasáu sieglu, tien proyectáu un palaciu d'esposiciones que va costar alredor de 24 millones d'euros, cantidá que va correr al cargu del Gobiernu Asturianu, que cumpliría asina col so compromisu de llevar un gran equipamientu cultural a Avilés, un equipamientu que de mano diba asitiase n'antigua térmica de Valliniello. Nun principiu, el Palaciu del arquitectu brasileñu va atechar el proyectáu muséu cola historia de los Premios Príncipe d'Asturies, anque'l nome oficial del proyectu ye'l de "Centru Cultural Óscar Niemeyer". La Fundación Príncipe tuvo presente nel actu de la firma del conveniu al traviés d'un representante.

L'anuncia de la construcción del proyectu del arquitectu premiu Príncipe d'Asturies nel 1989, que nunca llegó a pisar Asturies pa recibir el premiu por causa del mieu que-yos tien a los aviones, ta sacando angüeñes a clase política asturiana. Mientres que los partíos políticos del gobiernu de coalición avilesín (PSOE y IX-BA) s'echen al pie del proyectu del Gobiernu d'Asturies pa llevar el palaciu a la Villa del Adelantáu, n'Uviéu l'alcalde Gabino de Lorenzo entamó una campaña de firmes pidiendo que'l proyectu se lleve pa la capital asturiana. El rexidor carbayón nun cansa de facer declaraciones públiques nes qu'afita les xustificaciones y merecimientos de la capital pa merecer l'edificiu que tendría d'atechar la historia de los premios que s'entreguen na capital asturiana, anque l'arquitectu brasileñu asegura que'l proyectu ta pensáu p'Avilés y non pa otru llugar. En Conceyu Abiertu proponémos-yos a los nuestros llectores qu'opinen sobre esta polémica.