Areces entamó’l debate na Xunta Xeneral faciendo resume en positivo

El Presidente asturianu dio la ponencia d'apertura nel Debate sobre l'Estáu de l'Autonomía asturiana centrándose nes grandes obres financiaes pol estáu y pasando de refilón per cuestiones como la normalización del asturianu o la TV autonómica. Sobre'l primeru namá se dixo que'l gobiernu va desarrolar nel 2006 el Plan de Normalización y sobre la segunda Areces defendió que va echar a andar como "un serviciu públicu empobináu a favorecer el desarrollu cultural, y la cohexón territorial d'Asturies" El Salariu Social, ún de los puntos onde rincharon les rellaciones ente los socios de gobiernu a lo llargo de la selmana, apaeció al final del discursu y Areces nun quixo marcase sobre'l tope de financiación que va tener.

El discursu del presidente Areces, que calificó l'exerciciu 2005 como "un añu históricu" p'Asturies nel que la comunidá autónoma "venció la tendencia al declive" entamó con un bloque que baxo l'epígrafe "Radiografía d'una comunidá autónoma del sieglu XX" entamó una retafila de datos sobre la evolución del PIB o l'emplegu pa rematar afirmando que "n'Asturies nun hai deslocalización" pudiendo falase meyor d'un "procesu de localización" de les empreses en cuantes qu'esisten un 46% más d'empreses que nel añu 1999" una cifra tres de la qu'hai pal presidente asturianu un texíu d' empreses pequeñes y moces que s'abren a mercaos internacionales. Los datos del turismu n'Asturies dempués d'un branu históricu nesti sentíu complementaron esti bloque.

La siguiente parte de la intervención centróse en rescamplar los proyectos que l'estáu ta financiando n'Asturies. El compromisu del Gobiernu central pa poner 72 millones d'euros na obra del 'Hospital Universitariu de La Cadellada, la construcción del Puertu d'El Musel o la visita del presidente Zapatero na que se comprometió a enxertar la regasificadora p'Asturies na revisión del Plan enerxéticu d'España apaecieron nesta parte del discursu que centró toles meyores que se dieron n'Asturies en base al cambéu políticu nel gobiernu de Madrid que se dio nel 14 de marzu sdel 2004. Tres d'ello llegó'l balance del pasu del ecuador de la llexislatura, sobre'l qu'Areces defendió "prácticamente toles midíes concretes que s'espeyaben nel pautu de gobiernu tan yá entamaes y qu'un 66% de les mesmes yá tan executaes".

Una de les anuncies más interesantes de la sesión d'ayeri foi la que fizo'l xefe del executivu na siguiente parte del so discursu, cuando dixo que los grupos políticos de la Xunta Xeneral van recibir a lo llargo del mes d'ochobre'l resultáu del llabor de los comités d'espertos consultaos pol Gobiernu asturianu sobre la reforma del estatutu d'autonomía. Na parte de la so intervención qu'acutó pa falar sobre la reforma estatutaria y la presencia del Gobiernu Asturianu nes instituciones d'ámbitu superior como l'Estáu o la UE, Areces faló en términos positivos sobre'l desarrollu de l'actual versión del estatutu asturianu, rescamplando la tresferencia del Institutu Social de la Marina, la creación de la Sindicatura de Cuentes y la del Conseyu Consultivu d'Asturies.


El bloque central del discursu d'apertura, entituláu "Los Retos d'Asturies" dividióse en delles estayes, el desarrollu industrial, Investigación y Desarrollu y Recursos Naturales y Inversión Cultural, trés pegoyos nos qu'Areces asitió la "converxencia con Europa" mientres que la parte qu'echó'l piesllu al discursu centróse n'adelantar cuestiones básiques sobre los presupuestos d'Asturies pal 2006, sorrayando qu'estos van tener un calter espansivu y superando los 3.600 millones d'euros con una xuba del 8 por cientu. Un de los proyectu estrella de los mesmos va ser, según adelantó ayeri'l Presidente, un Plan d'Emplegu pa titulaos mozos de FP y universitarios.