Areces empondera’l programa electoral de Zapatero

El presidente del Principáu d'Asturies, Vicente Álvarez Areces, aseguró güei ante los medios de comunicación que'l programa del presidente del Gobiernu, José Luis Rodríguez Zapatero, "ta enllenu d'ilusión, de modernidá, de valentía, de tresparencia". "Ye'l programa d'una persona xoven qu'ilusiona y que, en contraste con otros candidatos, ofrez garantíes y seguridá pal futuru d'España y d'Asturies", dixo.

Areces participó ayeri nel actu de presentación de la candidatura de Zapatero a la presidencia del Gobiernu d'España, en Fuenlabrada (Madrid). Asina, tres la inauguración de la iniciativa, 'Vuelta Científica a Asturies', que se celebró güei n'Uviéu, el presidente autonómicu valoró les llinies de discursu y d'actuación del presidente y candidatu.

Según Areces, Rodríguez Zapatero esplicó ayeri los avances d'estos cuatro años de Gobiernu socialista, los d'una España "meyor" que la que recibiera nel 2004, "a pesar de la existencia d'una política de crispamientu orientada, sobre tou, dende'l partíu Popular, que nun evitó que s'algamaren avances mui notorios nel país", aseguró Areces.

El presidente asturianu resumió los avances socialistes en tres campos d'actuación. Destacó asina, el desarrollu de polítiques sociales "como hasta agora nun se ficiera cola intensidá rexistrada y nun cortu periodu" dixo y punxo como exemplos la Llei d'Igualdá, de Dependencia, del Matrimoniu Homosexual, y escontra la violencia de Xéneru, ente otres. "El propósitu d'avanzar na I+D+i, y la responsabilidá colectiva ante'l Cambiu Climáticu con polítiques complexes; asina como'l puxu de la convivencia democrática, a pesar de los intentos notorios de crispamientu del PP", fueron los otros méritos del Gobiernu Zapatero, señalaos por Areces.

Por otra parte, Areces defendió la identidá asturiana "siempre integrada en conceptos más amplios y universales". "Primero ta la identidá asturiana integrada n'España, un país al que queremos y nel que tamos, y onde mos alcontramos; y tamién integrada nuna Europa que pretende xugar un papel importante nel mundiu", afirmó.