Areces diz que ye ceo pa falar con IX-BA-LV sobre la repitición del alcuerdu de gobiernu

El yá presidente asturianu funciones hasta que se constituya la Xunta Xeneral de la llexislatura nueva, Vicente Alvarez Areces, declaró ayeri en Llaviana qu'inda ye ceo pa falar de pautos con IX-BA-LV, proponiendo que los tratos p'avanzar nesti camín nun entamen hasta'l mes de xunu "en cuantes tengamos yá tolos resultaos afitaos y se recuente'l votu emigrante". Areces recordó que lo lóxico ye que sía la FSA quien dea'l primer pasu na negociación política, y congracióse del resultáu de les votaciones que-y abrieron la puerta del so tercer mandatu, calificando los resultaos de "positivos" y albidrando que "van suponer la configuración d'un gobiernu de progresu que va servir a Asturies como ficimos a lo llargo d'estos años".

Areces congracióse igualmente de los bonos resultaos del PSOE nes elecciones a conceyos, sobremanera n'aquellos en que'l PP perdió la tradicional mayoría absoluta de qu'esfrutaba, como foi nos casos de Ribaeseya, Navia, Villaviciosa o Cabrales.

Pela so parte, el Coordinador d'IX Jesús Iglesias valoró mui positivamente los resultaos de les elecciones, calificando los 4 escaños de la coalición IX-BA-.LV como "determinantes" pal desarrollu de la vida política n'Asturies". Iglesias interpreta que'l pesu políticu d'IX-BA-LV caltiénse incluso cola baxada de votos que sufrió la coalición, y sorrayó la importancia del avance de la izquierda nes votaciones a conceyos. Iglesias declaróse dispuestu a negociar, pero alvirtió que si'l PSOE intenta imponer el so programa, quedaría solu na mesa. Dende la coalición, Rafael Palacios de Bloque por Asturies, valoró tamién los resultaos como mui importantes, rescamplando'l resultáu de L.lena, onde la llista de la coalición foi la más votada, y enfotóse en qu'esti fuere'l puntu de partida pa una candidatura más fuerte y qu'axunte más xente y más voluntaes nel 2011, añu qu'apuntó como crucial pa les reivindicaciones históriques del asturianismu.