Areces diz que nun va facese la mina de Salave

Esti fin de selmana, y con motivu d'una riestra d'inauguraciones que fexo na costa del occidente asturianu el presidente autonómicu Vicente Álvarez Areces aseló los ánimos encesos de los vecinos de Mántaras y Salave, en conceyu de Tapia, al afirmar que'l proyectu de la empresa Río Narcea Gold Mines pa entamar una mina d'oru a cielu abierto en Os Llagos de Silva nun va recibir el preste de l'alministración autonómica.

Vicente Alvarez Areces, al que recibieron en Castripol cientos de vecinos afectaos pola mina declaró que la mina d'oru de Salave queda "fuera de la llexislación y del ordenamientu urbanu" polo que "Los vecinos nun han temer que llegue a instalase". Areces confirmaba asina les primeres declaraciones del executivu asturianu contraries a la mina que fexere'l Conseyeru d'Industria Graciano Torre, que yá anunciare que la mina yera contraria a la llei del suelu, a les normes del Conceyu de Tapia y al Plan d'Ordenación del Litoral Asturianu (POLA)


Con ello, en Tapia siguen sin dase. Los vecinos quieren que se consiga una declaración de Reserva Natural Parcial pa defender el llugar de posibles actuaciones nun futuru y, per otra parte, quieren qu'a l empresa nun-y salga de baldre l'estropiciu que dicen que yá fexo nos Llagos de Silva al facer prospecciones, como pue vese na semeya, ensin contar con permisos pa ello, y cuenten con que l'alministración multe a la empresa por ello.