Areces diz qu'Asturies nun va enguedeyase en cuestiones identitaries na reforma del estatutu

El presidente asturianu Vicente Alvarez Areces, declaró ayeri qu'Asturies nun va "distraese" con debates "estériles" sobre cuestiones identitaries na reforma del so Estatutu d'Autonomía. Areces enfotóse en volver a garrar los trabayos de reforma estatutaria en pasando les elecciones p'afondar nel "autogobiernu racional".

Areces cuenta con que les fuerces anguaño favorables a la reforma, PSOE y IX, tengan representación abonda como pa poder garantizar que se faiga la reforma y declaró que n'Asturies "nun hebo nunca nengún problema, nin falsos debates sobre identidaes", siendo una "Comunidá histórica identificada coles sos propies tradiciones y historia, pero al empar integrada n'España y que quier siguir xugando un papel nel país y n'Europa".

Areces condenó la postura del PP na cuestión de la reforma estatutaria y llamó l'atención sobre'l fechu que la "bandera" qu'emplega'l PP pola que tolo que significa procesu de debate territorial ye negativo "contradizse" cola so posición ellí onde gobiernen o sofitaron reformes estatutaries mientres que n'Asturies, "onde nun hebo nenguna de les cuestiones que'l PP diz que son peligroses o distorsionantes ye la única Comunidá onde la reforma ta allancada pol vetu del PP".