Areces diz qu’Asturies entera va ser “un parque temáticu vivu”

El Presidente del Gobiernu asturianu participó nos actos del Día d'Asturies na Feria turística Fitur de Madrid, onde dio anuncia de qu'Asturies recibió nel añu 2005 la cantidá de 5.700.000 turistes, lo que supón un récord históricu.

Nel so discursu Vicente Álvarez Areces emponderó l'encantu turísticu del país y la política que se vien llevando dende la llegada del so executivu al poder nel añu 1999, conseñando que dende esa fecha'l turismu nun dexó de medrar. Apuntando a datos del INE y del Serviciu d'InFormación del Principáu d'Asturies (SIPA) Areces dixo que se dio una xuba grande de la tasa d'ocupación y aseguró que'l turismu asturianu "franció definitivamente" col fenómenu de la estacionalidá. El presidente tamién sorrayó que'l gastu mediu del turista que vien a Asturies ye un 39% más grande que nel 1999 y llamó l'atención sobre la llegada de más turistes estranxeros, siendo que'l númberu de visitantes de fuera d'España xubió un 41% respective al 2004. El Presidente asturianu emponderó l'efectu positivu d'esta xuba del turismu nel mercáu llaboral, qu'aseguró que contribuyó a crear 47.000 colocaciones nel 2005, lo que fai qu'ún de cada nueve puestos de trabayu n'Asturies dependa yá de la industria turística.

Areces xustificó l'optimismu d'estos datos pola "ufierta racionalizada" la meyora de l'acción del Gobiernu asturianu nel turismu al traviés de la Sociedá Rexonal de Turismu (SRT) pa la qu'anunció una xuba presupuestaria del 24%, les ayudes a los conceyos y mancomunidaes en materia turística y la presencia en feries del sector ente otros factores.

El presidente asturianu dixo que dende'l so Gobiernu queríen siguir ayudando a que les cifres del turismu fueren "históricamente altes" otra vuelta, pa lo que propunxo centrase na ",simbiosis ente cultura y turismu" pa lo que prometió qu'a lo llargo del 2006 "van materializase bien de proyectos que van facer d'Asturies un parque temáticu vivu d'Oriente a Occidente, multiplicando les acciones y cualificando tol territoriu de la Comunidá Autónoma". Darréu d'ello Areces faló d'estos proyectos, una riestra bien llarga d'ellos ente los que rescamplen la estación d'esquí n'Ayer, El Parque Históricu del Navia, el Parador Nacional de Courias, l'ampliación del Muséu de Belles Artes, el Muséu de la Prehistoria, col Centru d'Interpretación de la Fauna Glaciar n'Onís y el Centru d'Interpretación del Ídolu del Peñatu en Llanes, el Muséu del Oru de Navelgas y el Parque de la Prehistoria de Teberga. Como pieza central Areces asitió'l proyectu de la "Ciudá de la Cultura" na Universidá Llaboral de Xixón, qu'aseguró que diba ser " un espaciu ensin igual que va asitiar Asturies como referente n'España".