Areces comprométese a facer política llingüística

La intervención del Presidente del Principáu entamó esta mañana'l Debate sobre l'Estáu de la Comunidá Autónoma. Nun discursu dedicáu a dar anuncia de los proyectos que cuenta con llevar alantre l'executivu nesti cursu políticu, Vicente Álvarez Areces refirióse por primer vez con atención especial a la política llingüística del Principáu, lo que foi una de les mayores novedaes del discursu d'orientación política que tradicionalmente da aniciu al debate, que va siguir mañana coles preguntes de los grupos parlamentarios.

Areces anunció la llamada a un diálogu social "con tolos interlocutores necesarios" p'apautar un "analís fondu de la nuestra realidá llingüística". Areces prometió que nesti cursu políticu la llingua asturiana va tener "un tratamientu importante" valorándola como "elementu diferencial y ferramienta valiosa de la identidá cultural" y anunció que "van valorase les midides llegales que puedan iguar el marcu necesariu pa la so normalización social". Como midides concretes, el presidente prometió desarrollar el reglamentu pa l'aplicación de la Llei d'Usu y la intervención nel tema de la toponimia asturiana con un plan específicu de señalización vial y da-y una "actividá real" a la Xunta de Toponima.