Areces compromete'l Parque de la Prehistoria de Teverga pal 2006

El presidente del Principáu, Vicente Álvarez Areces comprometióse esta mañana en Teverga, onde foi a inaugurar les obres de reparación de la carretera AS-265, a proceder a l'apertura enantes del veranu del 2006 del Parque de la Prehistoria, una de les inversiones n'equipamientos culturales más importantes dientro de los proyectos del gobiernu asturianu, con un presupuestu alredor de los 10 millones d'euros y tamién ún de los más polémicos pola polémica con Ribeseya, qu'andaba tres d'una gran inversión na Cueva de "Tito Bustillo" y que se sintió agraviada por dir el mayor proyectu sobre la prehistoria astur a Teverga, un conceyu onde nun hai prácticamente afayos arqueolóxicos de nenguna de les dómines antigües de la prehistoria, asitiándose l'aniciu de la presencia humana en Teverga a lo cabero del neolíticu y siendo lo más importante ente'l conxuntu patrimonial del conceyu d'estes dómines los restos de Fresnéu,de la edá del bronce.

El presidente adelantó que l'equipamientu, yá cuenta con un proyectu científicu "ambiciosu y finalizáu", y dixo que ta formalizándose colos propietarios la venta de los terrenos precisos, tando tamién pa firmar el el Convenio col Ayuntamientu de Teverga. El presidente dixo que'l proyectu va "cambiar la vida de la comarca como pasó en Colunga y nos conceyos de la redolada n'inaugurándose'l Muséu del Xurásicu, que valtó toles previsiones".

Polo que se sabe hasta agora del proyectu museográficu, el muséu de Teverga va contar con una cueva subterránea con recreaciones de delles de les cueves más importantes del paleolíticu européu incluyendo amás unes doscientes reproducciones d'arte prehistóricu.