Areces aconceya col grupu inglés de tresporte NX, que podría participar nel consorciu de tresportes asturianu

El presidente asturianu Vicente Álvarez Areces visitó ayeri Londres, onde aconceyó con representantes de la empresa inglesa de tresportes NX, na que ta integrada l'asturiana ALSA. L'oxetivu del alcuentru, al que tamién asistieron el conseyeru de Mediu Ambiente, Infraestructures y ordenación del Territoriu, Francisco González Buendía y el director xeneral de Ferrocarriles Españoles de Vía Estrencha (FEVE), Juan Carlos Albizuru yera l'análisis de les fórmules de tresporte coles que trabaya la empresa británica en Londres col oxetivu d'adoptales n'Asturies.

Dempués de la entrevista, Areces definió a NX comoi "un grupu inversor comprometíu con Asturies y interesáu en participar nel Consorciu de Tresportes d'Asturies" ello nun momentu en que, según declaró Areces, el Gobiernu asturianu ta "estudiando posibilidaes respective al futuru del tresporte nel centru d'Asturies".

L'alcuentru en Londres produzse pocos díes dempués de que'l Gobiernu asturianu diera a conocer un plan urbanísticu que tendría que desarrollase na siguiente llexislatura y que reorganizaría'l centru d'Asturies. El proyectu, qu'incluye la creación de dos llinies de tren-tranvía ente'l centru de la capital asturiana y La Corredoria, llegando al Hospital Universitariu nuevu que ta en construcción y a los polígonos industriales de Siero y Llanera, tien como actuación más espectacular la construcción d'una llosa sobre l'autopista A-6 y la creación de barrios nuevos con cerca de 9.000 viviendes nueves na redolada de les llinies del tranvía.