Ardisana va ser recordáu na entrega del III Certame de Poesía Santa Rita

L’escritor Pablo Ardisana, fináu n'abril, va recibir un homenaxe póstumu esti sábadu en Cardosu. Va ser mientres la entrega de los premios del III Certame de Poesía Santa Rita, que fundó xuntó a Guillermo Fernández Buergo y Álvaro Ruiz de la Peña nel 1994.

L’Asociación Cultural La Volandina recuperó esti concursu de poesía, paralelu a la celebración popular nel prau de la capiella de Santa Rita, 22 años depués, una noticia qu’Ardisana recibió nel hospital y “que-y fixo muncha ilusión”, como treslladó la presidenta Begoña Collado a Asturies.com tres la muerte del autor de Ḥontoria. Yose Álvarez-Mesa, con 'Resgando bastios', foi la ganadora del certame na so estaya d’asturianu, polo que va recibir 400 euros y va ver espublizáu’l so poemariu.

L’actu d’entregra va comenzar a les 19 hores na Alameda de Cardosu cola presencia de Xuan Bello y nella van lleese poemes de les creaciones premiaes n’asturianu y castellanu. Héctor Braga y Marta Elola van poner la parte musical del certame poéticu.

A les 20 hores va celebrase una merienda popular na que vecinos y visitantes van compartir la comida, pa zarrar la fiesta dende les 22.30 hores coles actuaciones de Jerónimo Granda y del dúu Silvidos y Gemidos.