ArcelorMittal anuncia una inversión de 1.000 millones pa les sos plantes asturianes

La empresa pretende poner en marcha un importante plan de descarbonización.

El presidente executivo d'ArcelorMittal, Lakshmi Mittal, y el direutor xeneral, Aditya Mittal, tuvieron güei na factoría de Xixón acompañaos pol presidente Adrián Barbón y pol presidente del Gobiernu estatal, Pedro Sánchez, pa presentar los sos proyeutos p'Asturies. L'actu sirvió p'anunciar una inversión de 1.000 millones nes plantes asturianes.

La compañía con sede en Luxemburgu va construyir una planta de DRI (reducción direuta de mineral de fierro) con hidróxenu verde y un fornu d'arcu llétricu na factoría de Xixón que permitirán reducir n'aproximadamente un 50 por cientu les emisiones de carbonu cuando entren n'activo, a lo último del 2025. Amás, la Manifestación d'Interés roblada xunto col Executivu estatal afita qu'intensificará entá más los sos recursos d'I+D, mentes que l'Alministración promoverá reformes y inversiones pa impulsar el desendolcu y crecimientu d'un sector industrial fuerte, más competitivu y sostenible, y procurará d'igual forma facilitar el máximu apoyu financieru posible al proyeutu.

Na imaxe, Lakshmi Mittal, Aditya Mittal, Sánchez y Barbón. Semeya obra d'Armando Álvarez.