Arcelor amenaza con retirar fábriques d'Europa

La entrada del Protocolu de Kyoto, qu'apauta unos topes máximos d'emisiones contaminantes a cada estáu ta xenerando n'España, y, sobremanera n'Asturies, munches más tensiones que n'otros estaos de la UE. Ayeri mesmo, el Conseyeru d'Industria del Principáu, Graciano Torre, emplazó al Gobiernu central a apautar cola comunidá autónoma los criterios de repartu del volume de contaminación permitíu. Torre plantegó la necesidá de que l'Alministración central consulte a les comunidaes autónomes pa conocer l'impactu que puedan tener nos sos texíos productivos los mandaos del protocolu de Kyoto, y pidió-yal gobiernu que "nun emplegue los derechos d'emisión como un comerciu lliberal pa que unes empreses puedan ganar más perres qu'otres"

Les pallabres de Torre veníen a cuentu de l'alvertencia de la macrosiderurxa Arcelor de que los costes derivaos de l'aplicación de Kyoto -quien contamine penriba del tope va tener que pagar derechos d'emisión adicionales- puen forzar a la multinacional a trancar fábriques n'Europa. El recáu, que dio esta selmana'l conseyeru d'Arcelor Guy Dollé na presentación de los resultaos del 2.003 de la empresa, diba empobináu especialmente a Asturies, y ye que l'amenza d'Arcelor afecta directamente a les fábriques de productos ensin ellaborar. De momentu, Arcelor tien puestu un recursu contra la directiva de la UE qu'aplica a Europa'l mandáu de Kyoto. La multinacional quéxase de que la directiva comunitaria nun dexa trancar una planta nun país européu y utilizar los derechos de emisión d'esta n'otru estáu de la UE, en cuantes que cada estáu tien marcada una cuota. Otramiente, Arcelor ve faltes na directiva porque cada estáu va repartir derechos d'emisión ente sectores -químicu, eléctricu, etc- y nun s'apauta a quien -y correspuende cargar colos gases xeneraos pola siderurxa que se gasten pa facer corriente.