Arbón defende la so Veiga con música

Esti sábadu nel pueblu d'Arbón nel conceyu de Villayón, hai un magüestu en defensa de la vega d'Arbón que tendrá música y baille a partir de les siete la tarde.

El pueblu d'Arbón va bien de tiempu que tien entamada una campaña en defensa de la so vega. Un proyectu de la Conseyería de d'Infrastructures de construción d'una variante esfarraplaría tola vega, dexando al pueblu ensin el tradicional espaciu pa desenvolver la so actividá agrícola. Si queréis saber más coses sobre esta situación nun tenéis más que visitar esta web.

La plataforma en defensa de la Vega d'Arbón organiza actos ca poco pa da-y puxu a la so campaña, ente ellos ta esti magüestu del sábadu. A partir de les siete la tarde actuará la bandina de Xixón "L'Estorbín". bandina dirixida por David Varela, que participó nel pasáu concursu de bandines del Campoamor. Depués p'animar los bailles tará'l grupu de baille "El Cabazo", l'asociación "Juan Manuel Méndez" de la Caridá representará la obra de teatru "A pedida" de Pedro Velasco.

Pa pesllar cola música tradicional, tará "La Bandina", el grupu ayerán lideráu por Santi Caleya presentáse nel ocidente asturianu col discu "Pa Bail.lar", que tan bona acoyida tuvo ente'l públicu. La romería va cerrala la orquesta "Candela". Como nun pué faltar nun magüestu va haber castañes, sidra abondo, amás d'un concursu de tortielles, asina que too pinta pa que seya una tarde nueche de la más prestoso.