Arbón contra la carretera

El pueblu d'Arbón, nel occidental conceyu de Villayón, tien una guerra particular contra'l Gobiernu asturianu, que quier que pase pel medio de la veiga d'Arbón una variante de la carretera AS-25 (Navia - Villayón) que francería la veiga en dos cachos, pasando xusto pela parte onde ta la meyor tierra, esfarraplando'l patrimoniu del llugar y mangando una hipoteca enriba de cualquier posibilidá de desarrollu basáu n'agricultura y turismu sostenibles.

El tramu de la polémica, de cerca de 3 kilómetros, ye l'únicu que falta pa rematar la obra de carretera, pero dende l'asociación de vecinos dicen que'l proyectu nun tien xustificación en cuantes que nun ven que vaya meyorar la comunicación del interior cola costa. Nel completísimu web nel qu'ufierten tola información y noticies que va xenerando la carretera de marres, los vecinos inclúin tamién un estudiu de tiempos y distancies pa xustificar la oposición al proyectu, y espliquen la increible historia d'esta obra, que lleva emplantasmada dende 1996. Anque la xente d'Arbón consiguió demostrar en 1998 que la variante nun yera lo más conveniente, llogrando que se modificare'l proyectu, en setiembre de 2001 el Principáu volvió cola idea de facer la carretera pel medio la veiga. Los vecinos quieren que se faiga la carretera pero enanchando y meyorando la que yá hai, y non faciendo una variante que nun va meyorar la comunicación pero que va costar sobre 800 millones de pesetes.