Arbesú: “Hai una oportunidá nueva pa intentar una candidatura única lo más amplia y abierta posible”

Mariu Arbesú, candidatu de Conceyu Abiertu a les eleiciones nacionales últimes, considera que’l 25-M ye "una oportunidá nueva pa intentar una candidatura única lo más amplia y abierta posible”. La plataforma va aconceyar esti sábadu.

“Esta situación pillónos de sorpresa y de momento nun tratamos el tema, dalgo que vamos facer el sábadu nun conceyu”, esplica Arbesú, qu’añade que “la primer valoración que se pue facer ye que tamos ante una oportunidá nueva pa intentar una candidatura única lo más amplia y abierta posible. El nacionalismu d’izquierdes tenemos agora esa responsabilidá”. Na xunta d’esta fin de selmana ta prevista la toma de decisiones concretes nesi sen, anque Arbesú avanza que “tamos dispuestos a negociar y a falar con tol mundu”.

“Depués de la esperiencia de mayu quedó nidio que nel nacionalismu o nos ponemos d’alcuerdu nuna candidatura o’l votu va volver a dispersarse. Creo que ye’l momentu afayadizu pa plantegar unos puntos mínimos mui básicos en clave asturiana” cola fin de, más allá de los resultaos que s’algamen en marzu, “sentar unes bases de cara al futuru”, continúa Arbesú. Al respeuto, recuerda que Conceyu Abiertu ye “una plataforma de persones” y “una ferramienta válida que podría utilizase”, pero destaca qu’han de ser les organizaciones les que deben ponese d’alcuerdu p’algamar una candidatura única del nacionalismu.

Por último, el cabezaleru de la candidatura de Conceyu Abiertu na cita coles urnes de mayu, llamenta la situación na que s’alcuentra’l país “con 90.000 paraos” y critica que, por culpa “del sistema políticu nel que ta sometíu Asturies, que nun-y permite desarrollase económica nin políticamente”, se llegue a esta convocatoria d’eleiciones.