Aprobáu’l Plan de Normalización Llíngüística de Xixón

|
Aprobáu’l Plan de Normalización Llíngüística de Xixón

Na mañana del llunes, el plenu del Conceyu de Xixón aprobó’l Plan de Normalización Llíngüística de Xixón pa los años 2020-2023.
El Plan salió alantre colos votos de PSOE, Izquierda Xunida, Podemos y Foro. Vox votó en contra, y el Partido Popular y Ciudadanos abtuviéronse. Con estos votos el Plan tuvo la mayoría absoluta del Plenu.

El conceyal d’Educación y Cultura, Alberto Ferrao, defendió el Plan presentáu como un “documentu que protexe y busca normalizar l'asturianu, que pretende protexer el nuestru pasáu, salvaguardando'l nuestru presente y el nuestru futuru, salvaguardando la nuestra identidá nacional y rexonal, salvaguardando'l nuestru patrimoniu”. Afitando que nél siempre se fala de consensu.

Pela so parte, el conceyal d’IX Aurelio Martín, consideraba que en tres años el conceyu habría ser quien d’incorporar l’asturianu a la vida municipal y aumentar la so presencia.

La coalición Podemos –  Equo Xixón tamién mostró la so satifacción pola aprobación del Plan de Normalización Llingüística, pese al so continuismu. “Vamos dar esti votu recordando qu’esti nun ye’l nuestru plan; ye un plan de consensu nel que toles partes tuviemos que ceder, como se fixo hai cuatro años nel plan anterior pa integrar toles sensibilidaes. Esti plan ye prácticamente idénticu al que s’aprobó nesti plenu na llexislatura anterior. En parte ye asina porque hai midíes que requieren continuidá, pero en parte tamién tenemos qu’aprobar 4 años después un testu igual porque lo que s’aprobó hai cuatro años nun se cumplió ”, esplicó Juan Chaves. L’edil también defendió que Xixón sea ya billingüe: “Que siga siendo l’exemplu pa otros conceyos d’Asturies na promoción del Asturianu, de la llingua propia, y nel respetu de los derechos llingüísticos ”.

Dientro de les fuerces que sofitaron el Plan el conceyal de Foro quiso destacar que’l documentu presentáu “nun pretende imponer nada a nadie, sinon facer que l’asturianu y castellanu coexistan”. Anque s’intentó en feches previes sumar al alcuerdu final a Ciudadanos, y qu'esta formación confirmara'l so apoyu gracies a la negociación de dellos matices que l'equipu de gobiernu aceptara, finalmente abstuviéronse na votación alegando que ye un tema que crea crispación y que ellos tan a favor de la protección y promoción como “oxetu cultural” pero “non a la oficialidá, non a la imposición”.

Tamíen optó pola abstención el Partido Popular, onde el so voceru, Alberto López-Asenjo, mostró les sos dudes xurídiques y presupuestaries del Plan, amás de la so oportunidá, indicando que la normalización yera competencia del Principáu.

L’únicu votu en contra del Plan foi de los conceyales de VOX. Eladio de la Concha acusó que esti Plan de Normalización lleva a “una presunta o posible futura cooficialidá”, que provocaría una diferencia entre españoles, como yá ocurre notros llugares, indicó.

Contador Estadistiques