Aprobaes más midíes frenar la espansión de la covid-19

El presidente del Principáu aplaudió les midíes "contundentes, dures y clares" qu'adoptaron güei por unanimidá'l Ministeriu de Sanidá y les 17 comunidaes autónomes, nel senu del Conseyu Interterritorial del Sistema Nacional de Salú, para frenar la espansión de la covid-19. “Tenemos qu'evitar un nuevu confinamientu y tenemos que salvar vides”, sorrayó Adrián Barbón.

Los alcuerdos inclúin, ente otres iniciatives, el pieslle de los locales d'ociu nocherniegu (discoteques, bares de copes y sales de baille), la prohibición de fumar nes cais si nun hai distancia mínima de seguridá de dos metros y un fuerte control de los botellones en tol territoriu español. Amás, pa los establecimientos d'hostelería y restauración afítase l'horariu máximu de zarru la una de la madrugada y establezse un tope de diez comensales por mesa.

Tamién se decidió reforzar la seguridá nes residencies de mayores y otros centros sociosanitarios: realizar pruebes PCR a tolos nuevos ingresos, reducir les visites a una persona por residente y llendar les salíes de los usuarios.

La directora xeneral de Política y Planificación Sanitaries del Principáu, Trepa Clara Rodríguez, que güei participó per vía telemática na xunta del Conseyu Interterritorial, apuntó que toes estes acciones de protección impúlsense énte la medra de casos positivos producíu nes últimes selmanes n'España. “Toles comunidaes amosemos el nuesu alcuerdu por que la cohesión del Sistema Nacional de Salú y les iniciatives que se tomen nes distintes autonomíes tengan una coherencia”, precisó.

Per otra parte, el conseyu va celebrar llueu un alcuentru monográficu pa encetar l'entamu del próximu cursu escolar y les midíes que se deben impulsar pa protexer a profesoráu y alumnáu. Nesti sentíu, les conseyeríes de Salú y Educación d'Asturies yá trabayen estrechamente pa perfilar los protocolos que se van aplicar nesti ámbitu.

Na semeya (d'izqda. a dcha.): la directora de Calidá, Tresformación y Xestión del Conocimientu, Elena Llorente; la directora xerente del Sespa, Concepción Saavedra; el director de la Axencia de Seguridá Alimentaria, Sanidá Ambiental y Consumu, José Ignacio Altolaguirre, y la directora xeneral de Política y Planificación Sanitaries, Lidia Clara Rodríguez.