Aprobada la toponimia del conceyu de Casu

El Conseyu de Gobiernu del Principáu d'Asturies aprobó na so sesión d'esti xueves 17 de mayu l'espediente pol que se normalicen les formes toponímiques del conceyu de Casu. Con esti conceyu del altu Nalón son yá 23 los conceyos qu'oficializaron los sos nomes tradicionales de llugar a lo llargo de la llexislatura 2003-2007, que ta yá pa echar el piesllu.

El procesu d'oficialización de topónimos, qu'entamare nel 2005 cola aprobación d'once espedientes, los primeros los de Carreño, el Franco y Llanes, , paralizóse a lo llargo del 2006, un añu en que namás se-yos dio'l preste a los espedientes de Nava, Xixón, La Ribera y Colunga, y nel que la rocea ente los socios de gobiernu por esta cuestión alcanzó un puntu mui tensu, recuperándose'l procesu dende primeros del añu 2007 cola aprobación en xineru de los d'Amieva, Corvera, Grau y Noreña y acelerándose según s'allegaba'l final de la llexislatura.