Aprobada la integración del Hospital del Oriente nel Sespa

L’Hospital del Oriente, en Les Arriondes, intégrase de manera definitiva nel Serviciu de Salú del Principáu d’Asturies (Sespa). El Conseyu de Gobiernu aprobó esta decisión qu’implica la disolución de la Fundación Grande Covián.

Los conseyeros de Presidencia y de Sanidá, Florentino Alonso y José María Navia-Osorio, de manera respeutiva, esplicaron les razones d’esta decisión yá meditada. "Acaba la discriminación", dixo'l primeru, mentes que Navia-Osorio apuntó que la integración nel Sespa del hospital ye un pasu hacia "la normalización", yá que garantiza la estabilidá llaboral de los 301 trabayadores del centru. La próxima nómina que van recibir, correspondiente al mes de marzu, yá va ser del Sespa.

Alonso señaló tamién que l’interés del Gobiernu ye que los ciudadanos tengan un servicio "de calidá" independientemente de la zona na que vivan, y señaló qu’ésta yera una demanda qu’esistía na zona oriental. "Con esta midida los vecinos del oriente d’Asturies tarán nuna situación d’igualdá al restu d’asturianos no que se refier a l’asistencia sanitaria", añadió Navia-Osorio.

La historia del Hospital del Oriente se remonta al 28 de marzu del 1995, cuando’l Plenu del Conceyu de Parres aprobó la so participación como sociu fundador de la Fundación Hospital del Oriente de Asturias Francisco Grande Covián. El 12 d’abril d’esi mesmu añu, el Conseyu de Gobiernu del Principáu d’Asturies aprobó la participación del Executivu na constitución de la Fundación del Hospital. Mentes, el día 5 de mayu constituyóse oficialmente la Fundación pa xestionar la instalación, destinada a prestar servicios d’asistencia sanitaria y social.

L’hospital inauguróse de manera definitiva’l 2 de xunu del 1997, anque l’actu oficial celebróse’l 8 de xunu del 1998. Anguaño da asistencia a una población de 53.447 usuarios y ye centru de referencia del Área Sanitaria VI, compuesta polos conceyos d’Amieva, Cabrales, Cangues d’Onís, Caravia, Colunga, Llanes, Onís, Parres, Peñamellera Alta, Peñamellera Baxa, Piloña, Ponga, Ribedeva y Ribeseya. Amás proporciona atención sanitaria a los municipios de Posada de Valdeón y Oseya de Sayambre, en Lleón. El presupuestu del hospital pa esti añu ye de 26 millones d’euros.