Aprebada la segunda tanda de topónimos

El Conseyu de Gobiernu del Principáu d'Asturies dio-yos esta mañana'l preste a los espedientes toponímicos de Gozón, L.lena y Llangréu. Con ello, son yá seyes los conceyos asturianos que tienen la so toponimia revisada oficialmente tres del pasu yá nel mes d'abril, de los espedientes de Carreño, Llanes y El Franco.Con ello dase tamién la circunstancia de que la mancomunidá del Cabu Peñes tien revisada la toponimia de los dos conceyos que la faen.

Más de dos meses se precisaron pa qu'esta tanda nueva de topónimos pasare'l trámite definitivu, que s'espurrió nel tiempu hasta llegar al mes de xunetu cuando los responsables de política llingüística contaben con tener estos trés espedientes daos de pasu yá nel mes de mayu. Respective al aprebamientu de más espedientes, na rueda de prensa adelantóse que tan en procesu de revisión por parte de los sos respectivos conceyos, otros 9 espedientes que correspuenden a Ayer, Xixón, Llanera y los cinco que-y correspuenden a la Mancomunidá de la Comarca de la Sidra: Cabranes, Sariegu, Bimenes, Nava y Colunga.