Aposienta'l preciu del petroleu

Los precios del petroleu, que taba en máximos históricos dende 1990 aposentaron una migaya p'asitiase nos 36 dólares. Sicasí, ye un preciu mui penriba de lo esperao pa esti añu polos analistes. Los inversores aprovecharon los baxos precios pa dir a choyos mentanto que munchos de los índices de les boles internacionales tan esfarraplaos pel suelu. Asina l'Ibex-35 ta bien perbaxo los 8.000 puntos dempués de delles selmanes febles.

Les bolses del Vieyu Continente tuvieron una selmana enllena de blincos. Sacantes que'l vienres les bolses de París y Francfort pesllaron por fiestes nacionales,el restu de les bolses tuvieron un pieslle mui feble con probetayos volumes de negociu. Al otru llau del Atlánticu Wall Street peslló en positivo'l vienres gracies a les bones anuncies de baxada del petroleu. Asina l'índiz Dow Jones algamó los 9.966,74 puntos lo que supón una xuba del 0,29% mentanto que'l Nasdaq trancó nos 1.912,09 puntos medrando un 0,82%.

Nel parqué madrilanu'l volume de negociu foi mui baxu énte'l mieu de los inversores a una xuba de tipos nos Estaos Xuníos y a les repercusiones macroeconómiques de la xuba del preciu del petroleu.

Al final, el volume de negociu algamó los 1.631 millones d'euros, una de les cifres más baxes del añu na Bolsa de Madrid. L'Ibex asitióse nos 7.806,50 puntos con una perda del 0,14%. Los valores que más ganaron foron Amadeus, Acerinox y Arcelor con xubes penriba'l 2%. Ente les perdes destacaron Gas Natural, Iberdrola, Enagás, Telefónica, BBVA y SCH.

El preciu del petroleu sigue tirando p'abaxo peles bolses. L'oru prieto tien preocupaos a los ministros d'economía y a los economistes pol altu riesgu de que se dispare la inflación y les empreses pierdan competitividá. El casu ye que les presiones d'Estaos Xuníos sobre la OPEP yá ta dando resultaos como demuestra l'anuncia d'Arabia Saudí de xubir la producción de petroleu en dos millones de barriles diarios. Asina'l mercáu de futuros del petroleu de Llondres entamó una corrección nel preciu hasta los 36,50 dólares barril Brent.

De toles maneres les probetayes reserves enerxétiques nos Estaos Uníos xunta los conflictos en dellos países productores van caltener la volatilidá nos mercaos.

L'euru xubió y algamó una cotización de 1,20 respective al dólar, pero la selmana pasada foi la del yen, que ta reforzándose énte'l dólar, marcando la divisa norteamericana la cotización más baxa nes últimes dos selmanes. Nel mercáu de renta fixo la selmana foi mui tranquila algamando'l bund alemán una rentabilidá del 4,31%. Otramiente, perimportante xuba del oru con un 2% más hasta los 390 dólares onza.