Aporta la nieve a Asturies, con trece puertos nel que l’usu de cadenes ye obligáu

Na nueche del martes comenzaron les nevaes n’Asturies, que se van repetir nos díes próximos. La cantidá de nieve cayida obligó a prohibir el pasu de camiones pel puertu Payares na mañana, mentes qu’en otros treces pasos y cuatro carreteres ta namái permitíu’l pasu con cadenes, con una vía cortada en Ḷḷena.

Güei ta tol cordal y l’interior de les ales del país n’alerta mariella por temporal de nieve, que va ellevase a naranxa pa mañana y el vienres en toda Asturies a esceición de la mariña. Según informa l’Axencia Estatal de Meteoroloxía (Aemet), la causa ye la entrada d’una masa fría d’aire árticu pel norte de la Península Ibérica que tamién ta provocando un descensu bruscu de les temperatures.

Nun s’espera que, hasta’l domingu, se normalice la situación con respeuto a les nevaes, anque’l fríu caltendráse peles nueches. Les temperatures mínimes previstes pa mañana van dende los 3 graos de Xixón o Uviéu a los -4 de Somiedu.

Precaución na carretera

Daes estes condiciones meteorolóxiques, ye importante tener precaución na carretera nel casu de garrar el coche. A les 14 hores había una vía cortada, la LN-8 nel tramu de Tuíza al puertu de La Cubieḷḷa, y otres cuatro con obligación d’usu de cadenes, ente elles la que xubi a los Llagos.

Mentes, tamién son imprescindibles pa circular en trece puertos de montaña: El Palu, Pozu las Muyeres Muertas, La Marta, San Isidro, Ḷḷeitariegos, El Counio, Tarna, Zarréu, L’Acebu, La Cobertoria, Somiedu, San Ḷḷorienzu y Ventana. El Puertu Payares tuvo esta mañana, mientres, zarráu al tráficu de camiones, anque agora pue circulase con normalidá y ensin falta de tener puestes les cadenes.

Pue consultar l’estáu de les carreteres asturianes al momento calcando nesti enllaz.

Na semeya, zona d'Asturies n'alerta mariella güei por nevaes.