Apauten una tasa a los CDs y DVDs virxes

Un alcuerdu ente la industria fabricante y importadora d'encontos electrónicos y un conglomerau de corporaciones d'autores y derechos reprográficos va tasar los discos compactos y DVD virxes con un canon que va variar ente los 13 céntimos y los 1,40 euros.

Una tasa al consumidor sobre los materiales virxes. Esta ye la manera del conglomerau d'asociaciones d'autores y de drechos reprográficos de defendese de la fola de piratería de la que tanto vienen quexándose. L'alcuerdu firmose ente l'Asociación Multisectorial d'Empreses d'Electrónica y Comunicaciones (ASIMELEC) y seyes entidaes de xestión de drechos d'autor, que foron AIE (Artistes Intérpretes o Executantes), AISGE (Artistes Intérpretes, Sociedá de Xestión), EGEDA (Entidá de Xestión de Drechos de Propiedá Intelectual), DAMA (Drechos d'Autor de los Medios Audiovisuales) CEDRO (Centru Español de Drechos Reprográficos) y, por supuesto, la SGAE (Sociedá Xeneral d'Autores y Editores). L'alcuerdu vieno depués de que les denuncies que punxeron autores contra la industria fabricante d'encontos pa la grabación, que, temiendo que los pleitos salieren alantre, quixo más pactar un alcuerdu coles corporaciones.

Caro qu'esti alcuerdu ente industria y autores va tasar indiscrimanademente a tolos discos, lo mesmo los que se gasten en copiar grabaciones guardaes por drechos d'autor que los que s'empleguen en grabar datos particulares (como copies de seguranza del discu duru o descargues de semeyes de les vacaciones) nos que nun tien pitu que tocar nenguna asociación d'autores. Los firmantes del alcuerdu reconocen esta inxusticia, pero xustifíquense nel calter de desagraviu que tien esta tasa nueva sobre una situación que, al dicir d'autores, lleva dándose dende va bien de tiempu.

Contra esti alcuerdu namás salió la voz de l'Asociación d'Internautes, que lleva meses faciendo campaña contra esta tasa al traviés de la plataforma "sincanon". La AI diz que nun pue ser que'l dañu de la piratería a la industria discográfica tengan que pagalu los consumidores y denuncia que nesta negociación nun se contare cola presencia d'entidaes que defendieren l'interés de los consumidores. Yá faciendo una llectura más global del casu, la AI interpreta que les autoridaes públiques tan dexando que seyan les industries y los intereses particulares los que regulen toles actividaes rellacionaes coles nueves tecnoloxíes, poniendo portalgos onde-yos abulta conveniente, casu d'esta tasa a los cd's y dvd's virxes.