Apañu con Lituania

El vienres, la Federación Asturiana de Fútbol comprometiose a dar con una selección pa sustituyir a Arxelia nel partíu del día 29 de la selección asturiana. La FAF nun quixo dicir con quien andaba en tratos, pero presumía de tener dellos equipos candidatos con más nivel que la mesma Arxelia. A la fin, tres un apañu d'ultima hora forzáu poles circunstancies, el rival nun va ser precisamente un equipu de muncha categoría: Lituania. L'añu pasáu, la selección lituana perdió por 5-0 contra la catalana el mesmu día qu'Asturies ganó a Macedonia nel Tartiere. Capaz de xugar un partíu mui curiosu y perder de secute con equipos de menos nivel, Lituania, entrenada por Jankanicias Jelkevicius, tien la so estrella en Jankauskas, xugador conocíu pa l'afición asturiana por ser el delanteru de la Real Sociedá de Donostia. Anque quedaron los últimos na clasificatoria pal Mundial 2002, los lituanos tuvieron un bon partíu nel qu'empataron a ceros con Italia.