Apaez un pexe peláxicu na playa d'El Franco

Científicos del Centru pa la Protección y Estudiu de les Especies Marítimes (Cepesma) recoyeron esta mañana na Playa de Pormenade, conceyu d'El Franco un espectacular exemplar de Trachypterus arcticus o pexe remu de 2,30 metros de llargo.

L'animal en cuestión conózse más pol nome científicu que pol común, y ello ye porque nunca nun se ven na superficie, y menos peles nuestres llatitúes. Según espliquen los científicos del CEPESMA el Trachypterus arcticus ye un pexe típicu del mar del norte que vive nos fondos peláxicos 1.500 metros perbaxo de la superficie del mar, siendo la so presencia n'agües como les nuestres casualidá dafechu.

Eduardo Fernández Fernández foi quien informó a primer hora de la mañana al CEPESMA de la presencia del pexe muertu nel sable de la playa, procediendo darréu los técnicos del centru que dirixe Luis Laria a llevalu hasta l'aula del mar de L.luarca. Según afirmen trátase del mayor exemplar de la especie que nunca nun apaeciere na península, congraciándose los científicos del bon estáu de conservación, que va permitir guardar l'exemplar pal so estudiu y esposición

El Trachypterus arcticus llega a la madurez sexual ente los 11 y los 13 años, y na puesta la fema pon cerca de 400.000 güevos que ruempen ente 50 y los 100 metros baxo la superficie. Formalmente, esti pexe de forma achaplada estrémase bien polos sos güeyos grandes y por tener una aleta dorsal que recuerre tola espalda, entamando onde acaba'l cráneu y llegando hasta la mesma aleta caudal, que tien forma de ramu y ye d'un color encarnao enceso. El CEPESMA tien archivaos namás seyes contactos con esta especies, y cuenta con dos exemplares conservaos