Apaecen 54 casos de brucelosis en Quirós

La Conseyería de Mediu Rural y Pesca dio anuncia ayeri de l'apaición d'un brote de brucelosis en 54 vaques de la parroquia de Salceo, en conceyu Quirós.

Responsables de la Conseyería tuvieron ayeri una reunión colos afectaos, la Xunta de Pastos y l'Ayuntamientu de Quirós p'apautar les midíes a tomar pa desaniciar la enfermedá cuanto primero. Les 550 vaques de les siete cuadres afectaes van quedar inmovilizaes, pero van tomase otres midíes que van afectar a les cerca de 3.000 vaques de tola rodiada que pastien nel Aramu.

Ente lo que se va facer, el primer pasu va ser, lóxicamente, el sacrificiu de les vaques infestaes. El segundu va ser la prohibición de venta pa vida del ganáu que pastiare nos praos de la sierra del Aramu onde taben los animales nel intre d'infestase, mientres que los animales que se viendan pa carne van tener de dir acompañaos de tolos análisis obligatorios. D'otra manera van facese análisis nuevos, adelantando la siguiente campaña de control al mes de payares. La Conseyería tresmitió un mensaxe de tranquilidá y recordó que, por tratase d'un brote perfectamente aislláu y asitiáu, nun va haber problemes pa desanicialu

La brucelosis ye un mal qu'afecta al ganáu (vaques, oveyes, cabres y gochos) atacando tamién a animales de compañía como los perros pero que pue tener amás tresmisión a los humanos al comer carne o lleche d'animales infestaos ensin pasteurizar y tamién por tener contactu directu col animal. Anque se trata con antibióticos, pue derivar en crónica y mancar dellos órganos vitales como'l fégadu, los xenitales o'l cerebru, provocando complicaciones como meninxitis, inflamaciones de la vesícula etc