Añu nuevu, museos nuevos

Col añu nuevu, dellos proyectos de museos y equipamientos culturales entamen a garrar forma, dellos dempués d'años apigazando o tres de pasar por bien de problemes llegales o económicos. La recuperación del patrimoniu industrial de la minería y la industria de la conserva y la pesca son los exes de los trés proyectos qu'esconsoñen col añu.

El Conceyu de Carreño entamó los trámites pa contratar el proyectu básicu de lo que va ser el muséu de la pesca y la industria de la conserva, que va asitiase n'antigua fábrica de conserves de la empresa vasca Ortiz en Candás, una de les munches firmes que desarrollaron la so actividá nesti puertu nel sieglu XX. El plazu pa presentar ufiertes yá ta abiertu y les condiciones alcuéntrense en BOPA del 30 d'avientu. La empresa que se faiga cargu del proyectu tien trés meses de plazu pa ellaboralu, incluyendo la restauración del edificiu de la fábrica, sometíu a un procesu d'espropiación que forma parte del llargu espediente d'esti proyectu, el d'ún de los equipamientos culturales que más tiempu llevaben nel estoyu de proyectos por facer carreñinos, apaeciendo dacuando n'actualidá con polémica, como cuando l'añu pasáu el PP fizo pública la so quexa pola mala política p'atropar fondos documentales pal centru, de fechu gran parte de los mesmos alcuéntrense en mui mal estáu de conservación. Una de les característiques del edificiu de l'antigua fábrica, llevantáu nos años 40 del pasáu sieglu XX, ye'l so gran tamañu, ocupando cerca de 1.000 metros cuadraos, razón pola que'l grupu d'Andecha Astur nel conceyu pidió que, amás del muséu, tamién s'inxerten nel edificiu otros usos culturales y sociales.

Nun ye l'únicu muséu pal que paez que s'aclaria'l futuru nesti 2007 qu'entama. N'otru conceyu de la costa asturiana, Castrillón, yá tán preparaos pa entamar con otru centru de gran importancia, el que va recuperar pa muséu l'antiguu castillete de la mina de carbón d'Arnao, que data de la década de 1830 y que ye'l castillete de mina vertical más antiguu de la península. Como primer pasu pa ello, toles propiedaes de l'antigua Real Compañía Asturiana de Mines d'Arnao, les más d'elles trespasaes col tiempu a Asturiana de Zinc tán inxertes nel inventariu del Patrimoniu Cultural asturianu de la Conseyería de Cultura, mientres que la empresa punxo a nome del Conceyu'l castillete de la mina y la locomotora de vapor que se guarda nel so interior, ayalgues del conxuntu qu'incluye les escueles del Ave María o'l tunel del tren que pasa al llau de la playa de Salinas, pieces clave del entramáu social y industrial del complexu mineru y metalúrxicu del cinc qu'entovía caltién la so actividá nel llugar. Castrillón yá tien asina les blimes pa facer un bon equipamientu cultural, anque de cualquier manera, l'asociación de vecinos "Santa María del Mar" de Castrillón denunció ayeri que la locomotora nun apaez nos documentos de cesión al conceyu y que nun ta d'alcuerdu en como ta xestionando'l proyectu'l conceyu. Pa los vecinos d'esta asociación ye evidente que nun se cuenta dende les instituciones cola participación ciudadana nesti asuntu.

Yá fuera de la costa, en conceyu Mieres, el Valle de Turón ta pendiente de que se concrete la inversión pal parque arqueolóxicu que tien acutada nos Presupuestos Xenerales del Estáu pal añu 2007. Ún millón d'euros ye'l presupuestu que se va unviar dende l'estáu pa la potenciación del patrimoniu arqueolóxicu y industrial de Turón, que va facer del pozu La Rebaldana centru d'interpretación del patrimoniu industrial y mineru d'esti valle carboneru qu'apurría la so producción a Altos Hornos de Vizcaya, empresa qu'acaparaba cuasimente tola producción pa llevalo hasta les fábriques vasques. El valle, que vivió momentos de munchu puxu dende l'últimu terciu del sieglu XIX, vio como la crisis de los años 70 pesllaba toles mines del valle arrastrando con ella más de 6.000 puestos de trabayu. Amás de lo que cuenta con facese colos fondos del estáu, el plan completu previstu pal valle inclúi la creación d'un ferrocarril mineru ente los pozos de San Xosé, La Rebaldana y el Pozu Espinos, y la recuperación de toos estos pozos. Pa ello van ser precises más perres.