Antonio Virgili será'l direutor en funciones de la RTPA tres la dimisión de Guerenabarrena

FAC y PSOE propunxeron a Antonio Virgili, direutor d’Antena y Conteníos de la RTPA, como direutor en funciones del ente públicu de comunicación. Juan José Guerenabarrena presentó la so dimisión el miércoles.
 
Esta propuesta va llevase al llunes al conseyu d’alministración –del que forma parte l’asturianista José Suárez Arias-Cachero ‘Felechosa’ como ún de los seis representantes de FAC– pa la so aprobación. Foro y PSOE, que sumen los dos tercios dientru del órganu, decidieron amás aniciar un procesu consensuáu pa escoyer al direutor xeneral definitivu de la RTPA.
 
En declaraciones feches ayeri, el partíu nel Gobiernu consideró "anormal" que’l conseyu del ente tardase siete meses en reunise y calificó de "más anormal si cabe" que, una vegada aconceyáu, sía pa que’l direutor xeneral, Juan José Guerenabarrena, presente su dimisión tres considerar que “agotó una etapa". FAC, "nun exerciciu de responsabilidá", pretende col nomamientu en funciones de Virgili nun utilizar la situación de bloquéu que se produz cola marcha de Guerenabarrena que, según Foro, "dexa un barco ensin rumbu”.
 
"Cola marcha del direutor xeneral del ente, ¿quién va responsabilizase de les aiciones qu’adoptó esti señor dende que tomó posesión del so cargu nel mes de xunu pasáu?", entrúgense les mesmas fontes de Foro. Guerenabarrena garró hai seis meses la direición de la RTPA tres la dimisión de Ramón Pérez Ornia. Los diputaos de FAC, Cristina Coto y Juan Sancho Michell de Diego anunciaron el martes que pidiríen una comparecencia nueva na Xunta Xeneral del direutor saliente.