Antón García anuncia un programa d'enseñanza non reglada p’adultos d'asturianu y gallego-asturiano

El direutor xeneral de Política Llingüística compareció énte la Comisión de Cultura, Política Llingüística y Turismu a pidimientu de Ciudadanos. Ente les munches cuestiones trataes, Antón García avanzó dalgunos de los planes del so departamentu, como l’entamu nel 2022 d’un programa d’enseñanza non reglada d’asturianu y gallego-asturiano p’adultos.

“Partiendo de la esperiencia d’asociaciones o de los Servicios de Normalización Llingüística pa diseñar una rede formativa con implantación en tol territoriu, esti programa va valir, amás, pa promocionar la nuestra cultura y reflexonar sobre’l conocimientu propiu, munches veces pasivu, de la nuestra llingua materna”, esplicó García. Entiende qu’esta iniciativa va contribuyir al caltenimientu y fortalecimientu de les dos llingües propies “fomentando la espresión oral, la llectura y la conocencia de les normes d’escritura”.

La fase pilotu d’implantación del programa va facese cola collaboración de los conceyos que quieran sumase, estableciendo nellos Aules de Llingua p’Adultos. Esta iniciativa va ser accesible pa tola ciudadanía, va combinar la enseñanza presencial, la formación a distancia y l’autoformación y va ayudar a la preparación de les pruebes de certificación dientro del Marcu Común Européu de Referencia pa les Llingües.

El sábadu 9 van principiar precisamente les de nivel intermediu B2 y avanzáu C1 d’esti añu, cola previsión de que l’añu próximu se sumen les de gallego-asturiano. Nesi sen esplicó qu’esiste un primer borrador de decretu de niveles de certificación de la llingua del occidente del país.

Dos premios lliterarios nuevos

El gallego-asturiano va contar tamién con premios lliterarios cola creación del Ría del Eo, de poesía, y el Quiastolita, de lliteratura infantil. Los SNL de la zona van collaborar nel so desendolcu.

Tamién van entamase dos campañes de normalización llingüística: una destinada al sector alimentariu y otra sobre la sidra y el vocabulariu rellacionáu cola bébora nacional. Amás, va caltenese la collaboración col Festival Intercélticu de Lorient, que na so edición próxima va celebrar l’Année des Asturies.

Por último, respeuto a la toponimia, confirmó que Llanera va ser el próximu conceyu n’oficializar los sos nomes de llugar tradicionales depués de que’l Conseyu de Gobiernu diera’l preste a los de Salas. D’esta forma quedaríen namái 7 por completar el procesu.