Andecha lleva la represión que vive l’idioma y el casu d’El Musel a Bruxeles

Participó xunto con Puyalón de Cuchas y Alternativa Nacionalista Canaria nunes xornaes de trabayu nel Parllamentu Européu col so eurodiputáu Josu Juaristi. La represión que vive la llingua y “el fraude” d’El Musel, dalgunos de los temes trataos.

Una delegación de la organización nacionalista, que decidió nun presentase a les eleiciones estatales del 20 d’avientu, treslladóse a Bruxeles pa participar nes ‘Xornaes de trabayu estratéxicu n’Europa-Los Pueblos Deciden’ y esplicar de primer mano a representantes de la Comisión y el Parllamentu Européu temes qu’afeuten a Asturies que Juaristi (EH Bildu) ta treslladando a Europa como diputáu de la coalición Los Pueblos Deciden, de la que forma parte Andecha Astur. Asina, falóse sobre la discriminación llingüística, El Musel, los fondos mineros, el fracking o la situación na que s’atopa l’Autovía del Mar ente Xixón y Naunnt - Saint-Nazère tres el so pieslle.

Mientres estos díes pasaos, asturianos, aragoneses y canarios participaron n’aconceyamientos seutoriales, na que tamién hebo presencia d’espertos y representantes del movimientu asociativu a nivel européu, sobre les polítiques del agua y el suelu, les enerxíes anovables, l’agricultura y soberanía alimentaria, les polítiques de cohesión, el tresporte marítimu o l’alcuerdu Schengen. A ellos sumáronse dos conferencies, una dedicada a la fracturación hidráulica nel contestu européu y otra a les llingües minoritaries.

Llucía Fernández esplicó na segunda “la situación de represión llingüística que carecemos n’Asturies exemplarizada col pasáu trafullu elleutoral nel qu’Andecha Astur vio retiraes les sos papeletes, intercambiando impresiones col representante de la Comisión y colos espertos presentes nel seminariu”, ente ellos Davyth Hicks, secretariu xeneral de la European Language Equality Network (ELEN) –de la que forma parte Iniciativa pol Asturianu–, según esplicaron dende la organización. “A la fin, espertos nel área de diversidá llingüística reclamaren a les instituciones europees un papel más activu a la hora de facer cumplir a los estaos miembros y, n’especial, a los estaos francés y español a que protexan los derechos llingüísticos de la ciudadanía”, añaden.

Juaristi –na primer fila, segundu pela derecha– xunto con Fernández –a la so derecha– y el restu de miembros de les delegaciones asturiana, aragonesa y canaria.